Batu babañata baba mwa libato bapilanga hamoho pili basika nyalana kale. Babañwi baezanga cwalo kabakala kuli babata kuziba haiba baswanelana mi banahananga kuli kueza cwalo kuka batusa kukondisa habaka nyalana. Kana kwatusa kupila hamoho pili batu basika nyalana kale?

Ze mwa taba ye

•  Bibele ibulelañi fa taba yeo?

•  Kana kupila hamoho kuka mitusa kuitukiseza kukena mwa linyalo?

•  Kana kupila hamoho kuka mitusa kuitusisa hande masheleñi?

•  Kana kupila hamoho kuka mitusa kusanyalana ni mutu yasaswaneli?

•  Kana kunani nto yeñwi yekona kumitusa kuitukiseza kukena mwa linyalo?

•   Bibele yahanisa kueza somano ni mutu yelusika nyalana ni yena. Ka mutala, Bibele ibulela kuli: “Muambuke muzamao wa buhule.” (1 Matesalonika 4:3; 1 Makorinte 6:18) Taba yeo ikopanyeleza somano ye mwahalaa batu babapila hamoho, ili babasika nyalana kale nihaikaba kuli balela kunyalana hasamulaho. a Likuka za mwa Bibele litusanga batu baba mwa libato kusaba ni bana pili basika nyalana kale ni kuambuka lika zeñwi zemaswe zekona kubateñi haiba bapila hamoho pili basika nyalana kale.

•   Linyalo ki tukiso yezwa ku Mulimu. Hanaatomile linyalo lapili, naabulezi kuli: “Muuna ukasiya ndatahe ni mahe mi ukakumalela musalaa hae, mi bakaba nama iliñwi.” (Genese 2:24) Haiba muuna ni musali baikatulela kuli linyalo labona liine kuya kuile, bakaeza mobakonela kaufela kuba muuna yanyezi kamba musali yanyezwi yomunde mi kueza cwalo kukona kutahisa kuli balatane ni kutiisa linyalo labona.

 Babañwi banahana kuli kueza cwalo kwatusa. Baikutwa kuli batu bakona kuba ni yeloseli habanze baeza misebezi ya fa lapa hamoho ni kulemuha tulemeno twanani tona yomuñwi ni yomuñwi wa ku bona. Nihakulicwalo, nto yekona kutusa hahulu batu kukondisa mwa linyalo ki kusepahala ku mutu yebanyalani ni yena.

 Batu baba mwa libato bakona kukumalelana cwañi mwa linako zende ni zetaata? Batu habatokwi kupila hamoho ka nakonyana ili nako yeo bubeli bwabona baanga kuli libato labona ki laswalelele mi yomuñwi wa ku bona wakona kulifelisa ka nako ifi kamba ifi. Kono mane silikani satiyanga haiba batu baba mwa libato basepana hahulu ni kueza mobakonela kaufela kutatulula hamoho miinelo yetaata yebakona kukopana ni yona.

 Sisupo sa butokwa: Kupila hamoho pili batu basika nyalana kale kukona feela kutahisa kuli bakauhane mwa sibaka sa kubatusa kuitukiseza kukena mwa linyalo.

 Sikuka sa mwa Bibele: “Kaufela sacala mutu, ki sona hape sakakutula.”—Magalata 6:7.

 Babañwi banahana kuli kueza cwalo kwatusa. Ka kuya ka patisiso yene baezize ba Pew Research Center mwa America, nekufumanwi kuli mwahalaa batu babahulu baalishumi, babane kubona nebakalile kupila hamoho ni batu bane basika nyalana kale ni bona kuli baitusise hande masheleñi. Nihakulicwalo, hamulaho wa kupila hamoho ka nakonyana, buñata bwabona nebabulezi kuli libaka lelituna hane basika itukiseza kukena mwa linyalo neli kutokwa hande masheleñi.

 Kupila hamoho pili batu basika nyalana kale hape kwakona kutahisa butata bobuñwi, sihulu kwa basali. Ka mutala, hamulaho wa kufela kwa libato, hañata basali ki bona babanga ni buikalabelo bwa kubabalela bana.

 Sisupo sa butokwa: Lika zemaswe zekona kuzwa mwa kupila hamoho pili batu basika nyalana kale, ki zeñata hahulu kufita zende zekona kuzwa mwakueza cwalo.

 Sikuka sa mwa Bibele: “Na Jehova, ki na Mulimu wahao, yakuluta kuli ufumane tuso.”—Isaya 48:17.

 Babañwi banahana kuli kueza cwalo kwatusa. Nihakulicwalo, buka ya Fighting for Your Marriage ibulela kuli: “Batu babapilanga hamoho pili basika nyalana kale hañata habalemuhangi kuli kueza cwalo kutahisanga kuli kubabele taata kukauhana.” Kabakalañi? Batu babañwi babapila hamoho basika nyalana bakona kulemuha kuli habaswanelani. Kono bakeñisa kuli nebalekile simunanu sesiñwi hamoho, nebanyatezi tumelelano ya kutelela ndu, kamba musali ubile ni mulwalo ka kusalibelela, licaziba batalusa kuli batu bao bazwelangapili kupila hamoho ka libaka feela la kuli batwaelani mi habakoni kukauhana nihaikaba kuli kueza cwalo kwakona kubatusa. b Buka ya Fighting for Your Marriage izwelapili kubulela kuli, “batu babañwi bane baswanela kukauhana hane bali mwa libato, bafitanga fa kunyalana ka libaka feela la kuli batwaezi kupila hamoho.”

 Sisupo sa butokwa: Kufita kuli kupila hamoho kumituse kueza katulo yende, mane kukona feela kutahisa kuli kumibele hahulu taata kufelisa libato lemuli ku lona ni mutu yasaswaneli.

 Sikuka sa mwa Bibele: “Yabutali ubona kozi mi waipata, kono babasina zibo bazwelapili cwalo mi hasamulaho bautwa butuku.”—Liproverbia 22:3.

 Mwakona kuambuka butata bobuzwanga mwa kupila hamoho pili musika nyalana kale ni kueza lika zekona kumitusa kukondisa mwa linyalo. Ka mukwa ufi? Ka kumamela likuka za mwa Bibele ka za linyalo. Mube ni nako yeñata ya kuziba hande mutu yemubata kunyalana ni yena pili musika nyalana kale. Mwakona kuketa hande mutu wa kunyalana ni yena haiba lika zemuunga kuli lilukile kamba halisika luka ni litaba zemulumela zaswana ili nto ya butokwa hahulu kufita kulata mutu yo kabakala litakazo za somano.

 Mwa Bibele, kunani likelezo zeñata zekona kumitusa kuitukiseza kuba mwa linyalo lelitiile ni lelinani tabo. c Ka mutala, mwa Bibele kunani likuka zekona kumitusa . . .

•   kusaeza bubuki

•   kuba ni tulemeno totunde totuka mitusa kuba muuna kamba musali yomunde mwa linyalo

•   kulemuha lika zebonisa kuli mu mwa libato ni mutu yasaswaneli

 Kuli muzibe zeñata ka za litaba ze, mubone kalulo yeli, “Linyalo ni Lubasi” fa jw.org.

 Sikuka sa mwa Bibele: “Liñolo kamukana liñozwi ka kususumezwa ki moya wa Mulimu mi litusa kwa kuluta.”—2 Timotea 3:16.