1 Makolonika 10:1-14
-
Lifu la Saule ni bana bahae (1-14)
10 Cwale Mafilisita balwanisa Isilaele. Mi baana ba Isilaele babaleha kusaba Mafilisita, mi babañata ku bona babulaiwa fa Lilundu la Giliboa.+
2 Mafilisita nebali bukaufi hahulu ni Saule ni bana bahae, mi Mafilisita babulaya bana ba Saule bo Jonatani, Abinadabi, ni Maliki-shua.+
3 Ndwa yatatafalela Saule, mi babakunupa ka buta bamufumana, mi bamuholofaza.+
4 Saule kihaa li ku mulwali wa lilwaniso zahae: “Comola mukwale wahao, unibulaye ka ona, kuli baana babasika ya kwa mupato ba, basike bato nieza ka situhu.”*+ Kono mulwali wa lilwaniso zahae naasalati kueza cwalo, kakuli naasabile hahulu. Saule kihaa nga mukwale mi aikwiseza ku ona.+
5 Mulwali wa lilwaniso zahae habona kuli Saule ushwile, ni yena aikwiseza fa mukwale wahae mi ashwa.
6 Ka mukwa ocwalo, Saule ni bana bahae babalaalu bashwa, mi ba ndu yahae kaufela bashwa hamoho.+
7 Batu kaufela ba Isilaele bane bali mwa musindi* hababona kuli mañi ni mañi ubalehile ni kuli Saule ni bana bahae bashwile, bakala kuzwa mwa mileneñi yabona mi babaleha; mi Mafilisita bato pila mwateñi.
8 Lizazi lelitatama, Mafilisita habataha kuto tubula litupu liapalo ni kuunga lilwaniso za ndwa, bafumana Saule ni bana bahae inze bashwile fa Lilundu la Giliboa.+
9 Kiha bamutubula liapalo ni kumupuma toho ni kuunga lilwaniso zahae, mi baluma liñusa mwa naha kaufela ya Mafilisita kuli bazibise taba yeo kwa milimu yabona ya maswaniso+ ni kwa sicaba.
10 Mi bayo beya lilwaniso zahae mwa ndu* ya mulimu wabona, mi bakokotela katendele kahae fa limota mwa ndu ya Dagoni.+
11 Batu kaufela ba mwa Jabeshi+ mwa Giliadi habautwa lika kaufela zene baezize Mafilisita ku Saule,+
12 lindwalume kaufela bananuha mi bayo nga situpu sa Saule ni litupu za bana bahae. Balitisa mwa Jabeshi mi bapumbeka masapo abona mwatasaa kota yetuna mwa Jabeshi,+ mi baitima lico ka mazazi a 7.
13 Saule ashwa cwalo kakuli naasika sepahala ku Jehova,+ ka kusautwa linzwi la Jehova, ni ka kuyo buza mulauli+
14 kufita kubuza Jehova. Kabakaleo, Mulimu amubulaya mi ayolisa Davida mwanaa Jese fa bulena.+
