1 Makolonika 18:1-17
18 Hamulaho wa nako, Davida atula Mafilisita ni kubakokobeza mi abaamuha muleneñi wa Gati+ ni litoloponyana ze mwa matuko aona.+
2 Kihona atula Moabi,+ mi Mamoabi baba batanga ba Davida mi bamuzwiseza ñamba.+
3 Davida atula Mulena Hadadezeri+ wa Zoba+ bukaufi ni Hamati+ hanaali mwa nzila ya kuyo tiisa puso yahae kwa Nuka ya Eufrati.+
4 Davida ahapa ku yena likoloi ze 1,000, bapahami ba lipizi ba 7,000, ni masole babazamaya ka mahutu ba 20,000.+ Mi Davida apuma misifa ya kwa mahutu a lipizi kaufela zenehoha likoloi, asiya feela kwateñi lipizi ze 100.+
5 Masiria ba mwa Damaseka hane batilo tusa Mulena Hadadezeri wa Zoba, Davida abulaya Masiria ba 22,000.+
6 Cwale Davida abeya litopa za masole mwa Siria wa Damaseka, mi Masiria baba batanga ba Davida mi bamuzwiseza ñamba. Jehova atusa Davida kutula* kwanaaya kaufela.+
7 Kutuha fo, Davida aanga litebe za laundi za gauda kwa batanga ba Hadadezeri mi alitisa mwa Jerusalema.
8 Mwa Tibati ni Kuni, yona mileneñi ya Hadadezeri, Davida aanga mwateñi kopa yeñata hahulu. Mi Salumoni aitusisa yona kwa kueza Liwate la kopa,+ misumo, ni lisebeliso za kopa.+
9 Mulena Tou wa Hamati hautwa kuli Davida utuzi mpi kaufela ya Mulena Hadadezeri+ wa Zoba,+
10 honafo aluma Hadorami mwanaa hae ku Mulena Davida kuyo mubuza mwazuhela ni kuitumela ku yena kabakala kuli ulwanile ni Hadadezeri ni kumutula (kakuli Hadadezeri naalwanisanga Tou hañata), mi amuiseza mifuta kaufela ya lika za gauda, za silivera, ni za kopa.
11 Mulena Davida afa* Jehova lika zeo,+ hamoho ni silivera ni gauda yanaangile kwa macaba kaufela: ili kwa Edomo ni Moabi, kwa Maamoni,+ Mafilisita,+ ni Maamaleke.+
12 Abishai+ mwanaa Zeruya+ abulaya Maedomo ba 18,000 mwa Musindi wa Lizwai.+
13 Abeya litopa za masole mwa Edomo, mi Maedomo kaufela baba batanga ba Davida.+ Jehova atusa Davida kutula* kwanaaya kaufela.+
14 Davida azwelapili kubusa Isilaele kaufela,+ mi aatulela batu bahae kaufela ka kuluka ni ka mulao.+
15 Joabi mwanaa Zeruya naazamaisa mpi,+ mi Josafati+ mwanaa Akiludi neli muñoli wa litaba,
16 Zadoki mwanaa Akitubu ni Akimeleki mwanaa Abiatare neli baprisita, mi Shavisha neli muñoli.
17 Benaya mwanaa Jehoyada naazamaisa Makereti+ ni Mapeleti.+ Mi bana ba Davida babashimani neli bona bane batatama mulena kwa situlo.
Litaluso ze kwatasi
^ Kamba “afa Davida puluso.”
^ Linzwi ka linzwi, “akeniseza.”
^ Kamba “afa Davida puluso.”
