1 Makolonika 20:1-8
20 Kwa makalelo a silimo,* ka nako yebayanga malena kwa ndwa, Joabi+ aetelela mpi kwa ndwa mi ayo sinya naha ya Maamoni; aya kwa muleneñi wa Raba+ mi auambeka, Davida inzaa siyezi mwa Jerusalema.+ Joabi alwanisa muleneñi wa Raba mi auwisa.+
2 Cwale Davida atubula Malukami* kuwani ya bulena, mi afumana kuli neiweita talenta iliñwi* ya gauda, mi ku yona nekunani macwe a butokwa; mi yaapeswa Davida kwa toho. Hape ahapa lika zeñwi zeñata mwa muleneñi.+
3 Mi azwiseza kwande batu bane bali mwateñi mi abafa musebezi+ wa kusaha macwe ni wa kuitusisa lisebeliso za sipi zelozizwe ni licapu. Davida aeza cwalo kwa mileneñi kaufela ya Maamoni. Mi Davida ni masole bane bali ni yena kaufela bakutela kwa Jerusalema.
4 Hamulaho wa zeo, mwa Gezeri kwazuha ndwa ya kulwana ni Mafilisita. Ka nako yeo, Sibekai+ wa Muhusha abulaya Sipai, wa lusika lwa Marefaimi,+ mi Mafilisita bakomiwa.
5 Kwazuha ndwa yeñwi ya kulwana ni Mafilisita, mi Elikanani mwanaa Jairi abulaya Lahimi mwanahabo Goliati+ wa Mugiti, yanaanani lilumo lelinani teku yelikana ni musumo wa baluki.+
6 Kwaba ni ndwa yeñwi hape mwa Gati,+ mi mwateñi nekunani muuna wa singangalume,+ yanaanani minwana ye 6 kwa lizoho leliñwi ni leliñwi, ni ye 6 kwa lihutu leliñwi ni leliñwi. Minwana yahae kaufela neli ye 24 haibalwa; mi ni yena neli wa lusika lwa Marefaimi.+
7 Azwelapili kunyefula+ Isilaele. Cwale Jonatani mwanaa Shimea,+ muhulwanaa Davida, amubulaya.
8 Bao neli ba lusika lwa Marefaimi+ mwa Gati,+ mi babulaiwa ki Davida ni batanga bahae.
Litaluso ze kwatasi
^ Fo kikuli, mwa mbumbi.
^ Ibato ba makilogilamu a 34.2. Mubone Litaba Zeekelizwe B14.
