Liñolo Labubeli Makorinte 10:1-33
10 Cwale mizwale, nibata kuli muzibe kuli bo kuku waluna nebali mwatasaa lilu kaufelaa bona+ mi nebasilile liwate kaufelaa bona+
2 mi kaufelaa bona nebakolobelizwe ku Mushe ka lilu ni ka liwate,
3 mi kaufelaa bona nebacile sico sesiswana sa kwa moya+
4 mi kaufelaa bona nebanwile mezi aswana a kwa moya.+ Kakuli nebanwanga mezi a mwa licwe la kwa moya lene libalatelela, mi licwe leo neliyemela* Kreste.+
5 Nihakulicwalo, Mulimu naasika tabiswa ki buñata bwabona, mi nebabulaezwi mwa lihalaupa.+
6 Cwale litaba zeo lifetuhile litemuso ku luna, kuli lusike lwalakaza lika zemaswe, sina mone baezelize.+
7 Mi lusike lwalapela milimu ya maswaniso, mone baezelize babañwi ku bona; sina hakuñozwi kuli: “Batu baina fafasi mi baca ni kunwa. Kihona bayema mi baitabisa.”+
8 Mi lusike lwaba ni muzamao wa buhule,* sina babañwi ku bona hane babile ni muzamao wa buhule,* mi kwashwa ku bona ba 23,000 mwa lizazi lililiñwi.+
9 Hape lusike lwalika Jehova,*+ sina mone bamulikezi babañwi ku bona, mi babulaiwa ki linoha.+
10 Mi hape lusike lwatongoka, sina mone batongokezi+ babañwi ku bona, mi babulaiwa ki muyundisi.+
11 Cwale lika zeo neliezahezi ku bona sina mitala, mi neliñolezwi kulemusa luna+ babatahezwi ki linako za maungulo.
12 Ka mukwa ocwalo, yanahana kuli uyemi atokomele kuli asike awa.+
13 Hakuna muliko omitahezi konji otahela batu kaufela.+ Kono Mulimu wasepahala, mi hana kumituhelela kuli mulikwe ki muliko omusa koni kutiyela,+ kono hamutahelwa ki muliko uka mifa ni nzila ya kuzwa ku ona ilikuli mukone kuutiyela.+
14 Ka mukwa ocwalo, mina balatiwa baka, musabe kwa sebelezo ya milimu ya maswaniso.+
15 Nibulela sina yabulela kwa batu babanani temuho; muikatulele zenibulela.
16 Komoki ya mbuyoti yeluitumela, kana haitalusi kuabana hamoho mwa mali a Kreste?+ Sinkwa selukomauna, kana hasitalusi kuabana hamoho mwa mubili wa Kreste?+
17 Kakuli kunani sinkwa silisiñwi, mi luna nihaluli babañata, lu mubili ulimuñwi,+ kakuli kaufelaa luna luca kwa sinkwa silisiñwi seo.
18 Hamunahane za Isilaele wa nama: Kana babacanga matabelo habaikabelangi ni aletare?+
19 Cwale ki sifi senitalusa? Kana zetabezwi mulimu wa siswaniso ki sesiñwi, kamba mulimu wa siswaniso ki sesiñwi nji?
20 Kutokwa; kono senitalusa kikuli lika zeo macaba afa sina sitabelo, alifa kwa madimona isiñi ku Mulimu;+ mi hanilati kuli muikabele ni madimona.+
21 Hamukoni kunwa mwa komoki ya Jehova* ni mwa komoki ya madimona; hamukoni kuca kwa “tafule ya Jehova”*+ ni kwa tafule ya madimona.
22 Kamba ‘kana lubata kushemaeta Jehova* kuli abe ni lifufa’?+ Kana lunani maata kumufita?
23 Lika kaufela lilumelelizwe, kono haki lika kaufela zetusa. Lika kaufela lilumelelizwe, kono haki lika kaufela zeyahisa.+
24 Mutu ni mutu asike aipatela sesiswanela yena anosi, kono abate sesiswanela yomuñwi.+
25 Muce nto kaufela yelekiswa fa musika wa nama, musabuzi sesiñwi kabakala lizwalo lamina,
26 kakuli “lifasi ki la Jehova,* ni zeinzi mwateñi kaufela.”+
27 Haiba mutu yasalumeli amimema mi mwalata kuya, muce lico kaufela zamifa, musabuzi sesiñwi kabakala lizwalo lamina.
28 Kono haiba yomuñwi amibulelela kuli: “Ze ki zefilwe sina matabelo,” musike mwaca kabakala yo yamibulelezi cwalo ni kabakala lizwalo.+
29 Fo hanitalusi lizwalo lamina, kono nitalusa la yomuñwi. Kakuli tukuluho yaka kiñi seika atulelwa ki lizwalo la mutu yomuñwi?+
30 Haiba nica ka buitumelo, kiñi senika nyefulelwa kabakala sico senifela buitumelo?+
31 Ka mukwa ocwalo, niha muca niha munwa kamba hamueza nto ifi kamba ifi, mueze lika kaufela kuli Mulimu akanyiswe ka zona.+
32 Mutuhele kuba lisitataliso kwa Majuda ni kwa Magerike ni kwa puteho ya Mulimu,+
33 sina na monilikela kutabiseza batu kaufela mwa lika kaufela, nisabati zeswanela na ninosi+ kono zeswanela babañata, ilikuli bakone kupiliswa.+
Litaluso ze kwatasi
^ Kamba “neli.”
^ Mubone Litaluso za Manzwi.
^ Mubone Litaluso za Manzwi.
^ Mubone Litaba Zeekelizwe A5.
^ Mubone Litaba Zeekelizwe A5.
^ Mubone Litaba Zeekelizwe A5.
^ Mubone Litaba Zeekelizwe A5.
^ Mubone Litaba Zeekelizwe A5.
