Liñolo Lapili la Pitrosi 3:1-22
3 Ka mukwa oswana, mina basali, muipeye kwatasaa baana bamina,+ ilikuli haiba babañwi ku bona habamameli linzwi, bakolwiswe kusina linzwi lelibulelwa kabakala muzamao wa basali babona,+
2 bakeñisa kuba lipaki zeiponezi muzamao wamina okenile+ hamohocwalo ni likute lelituna.
3 Kukaba kwamina kusike kwaba kwa kwande—kwa kuota milili ni kuapala likabisa za gauda+ kamba liapalo zende—
4 kono kube kwa mutu wa mwahali, wa mwa pilu, ka kukabiswa kokusa koni kubola kwa moya wa muombela ni obunolo,+ ili wa butokwa hahulu mwa meeto a Mulimu.
5 Kakuli ki mone baikabisezanga basali babakenile baikale, bane basepile Mulimu, banze baipeya kwatasaa baana babona,
6 sina Sara hanaautwa Abrahama, ka kumubiza kuli mulena.+ Mi mina mufetuhile bana bahae, ibile feela muzwelapili kueza hande musasabi sesiñwi.+
7 Ni mina baana, muzwelepili kupilisana ni bona ka kutwisiso.* Mubafe likute+ sina lipiza zefokola, sina basali, kakuli mukaca hamoho ni bona saanda+ sa sishemo sa bupilo, ilikuli litapelo zamina lisike zapaleliswa ki sesiñwi.
8 Ka kufeza nili, kaufelaa mina mube ni maikuto alimañwi,*+ muutwelane butuku, mulatane ka kuba mizwale, mube ni mukekecima,+ ni buikokobezo.+
9 Musike mwakutisa bumaswe ka bumaswe+ kamba litapa ka litapa.+ Kono mufuyole baba mieza cwalo,+ bakeñisa kuli nemubizelizwe bupilo bo, kuli mukone kuamuhela mbuyoti.
10 Kakuli “mutu kaufela yaiketela kulata bupilo ni kubona mazazi amande ulukela kutibela lulimi lwahae kwa bumaswe+ ni mulomo wahae kwa kubulela bupumi.
11 Atuhele kueza zemaswe+ mi aeze zende;+ abate kozo mi aitundamene.+
12 Kakuli meeto a Jehova* atalimezi babalukile, mi mazebe ahae ateeleza kwa likupo zabona,+ kono pata ya Jehova* ilwanisa babaeza lika zemaswe.”+
13 Kaniti, ki mañi yaka mieza maswe haiba mutukufalelwa kueza zende?+
14 Kono niha munyanda kabakala kuluka, munani tabo.+ Niteñi, musike mwasaba zebasaba,* mi musike mwafilikana.+
15 Kono mukenise Kreste sina Mulena mwa lipilu zamina, kamita inze muitukiselize kuikalabela ku mutu kaufela yamibuza za sepo yeliteñi ku mina, kono mueze cwalo ka bunolo+ ni ka likute lelituna.+
16 Mube ni lizwalo lelinde,+ kuli mwa litaba kaufela momubulelwa maswe, baba mibulela maswe bakone kuswaba+ kabakala muzamao wamina omunde ka kuba balateleli ba Kreste.+
17 Kakuli ki hande hamunyanda kabakala kuli mueza zende,+ haiba tato ya Mulimu ilumeleza cwalo, kufita kunyanda kabakala kueza zemaswe.+
18 Kakuli Kreste naashwile feela hañwi bakeñisa libi,+ yalukile naashwezi babasika luka,+ ilikuli amilibise ku Mulimu.+ Naabulailwe inze anani mubili wa nama,+ kono apiliswa inze anani mubili wa moya.+
19 Mi hanaali mwa muinelo wo, naaile kuyo kutaza kwa mioya yeneli mwa tolongo,+
20 yene isika utwa ka nako yeo Mulimu naalibelezi ka pilu-telele mwa mazazi a Nuwe,+ aleka hane isweli kuyahiwa,+ ili mo batu basikai, fo kikuli, mioyo* ye 8, nebapilisizwe kwa mezi.+
21 Kolobezo, yeswaniseza taba yeo, ni yona yamipilisa cwale (isiñi ka kuzwisa masila a kwa mubili, kono ka kupo yeeziwa ku Mulimu kuli mube ni lizwalo lelinde),+ ka zuho ya Jesu Kreste.
22 Uinzi ku la bulyo la Mulimu,+ kakuli naaile kwa lihalimu, mi mangeloi ni bulena ni maata nelibeilwe mwatasaa hae.+
Litaluso ze kwatasi
^ Kamba “kubaiseza pilu; kubautwisisa.”
^ Kamba “munahane ka kulumelelana.”
^ Mubone Litaba Zeekelizwe A5.
^ Mubone Litaba Zeekelizwe A5.
^ Kamba mwendi, “musike mwasaba mifumbo yabona.”
^ Kamba “batu.”
