1 Samuele 31:1-13
-
Lifu la Saule ni bana bahae babashimani babalaalu (1-13)
31 Cwale Mafilisita balwanisa Maisilaele.+ Mi baana ba Isilaele babaleha fapilaa Mafilisita, mi buñata bwabona babulaiwa fa Lilundu la Giliboa.+
2 Mafilisita nebali bukaufi hahulu ni Saule ni bana bahae, mi Mafilisita babulaya bana ba Saule bo Jonatani,+ Abinadabi, ni Maliki-shua.+
3 Ndwa yatatafalela Saule, mi babakunupa ka buta bamufumana, bamuholofaza maswe.+
4 Saule kihaa li ku mulwali wa lilwaniso zahae: “Comola mukwale wahao, unibulaye ka ona, kuli baana babasika ya kwa mupato ba,+ basike bato nibulaya ka mukwale ni kunieza ka situhu.”* Kono mulwali wa lilwaniso zahae naasalati kueza cwalo, kakuli naasabile hahulu. Saule kihaa nga mukwale mi aikwiseza ku ona.+
5 Mulwali wa lilwaniso zahae habona kuli Saule ushwile,+ ni yena aikwiseza fa mukwale wahae mi ashwa hamoho ni yena.
6 Ka mukwa ocwalo, Saule, ni bana bahae babashimani babalaalu, ni mulwali wa lilwaniso zahae, ni baana bahae kaufela, bashwa hamoho ka lizazi leo.+
7 Maisilaele bane bayahile mwa sibaka sa musindi* ni mwa sibaka sa Jordani hababona kuli baana ba Isilaele babalehile ni kuli Saule ni bana bahae bashwile, bakala kuzwa mwa mileneñi yabona mi babaleha;+ mi Mafilisita bato pila mwateñi.
8 Lizazi lelitatama, Mafilisita habataha kuto tubula litupu liapalo ni kuunga lilwaniso za ndwa, bafumana Saule ni bana bahae babalaalu inze bashwile fa Lilundu la Giliboa.+
9 Kiha bamupuma toho ni kuunga lilwaniso zahae mi baluma liñusa mwa naha kaufela ya Mafilisita kuli bazibise taba yeo+ mwa mandu* a milimu yabona+ ya maswaniso ni mwahalaa sicaba.
10 Mi bayo beya lilwaniso zahae mwa ndu ya Ashitaroti, mi bakokotela situpu sahae fa limota la Beti-shani.+
11 Batu babayahile mwa Jabeshi-giliadi+ habautwa Mafilisita mobaezelize Saule,
12 lindwalume kaufela bananuha mi bazamaya busihu kaufela, bayo pahulula situpu sa Saule ni litupu za bana bahae babalaalu fa limota la Beti-shani. Bakutela kwa Jabeshi, bayo liciseza kwateñi.
13 Kihona baanga masapo abona,+ baapumbeka mwatasaa kota ya tamarisike mwa Jabeshi,+ mi baitima lico ka mazazi a 7.
