Liñolo Lapili ku Timotea 5:1-25
5 Usike wanyaza hahulu muuna-muhulu.+ Kono umukupe sina ndataho, micaha ubaange sina banyani bahao,
2 basali-bahulu sina bo maho, likalibe sina likaizeli zahao, ka bukeni kaufela.
3 Ukuteke limbelwa zeli limbelwa luli.*+
4 Kono haiba mbelwa unani bana kamba baikulu, bao baitute pili kubonisa kusepahala kwabona ku Mulimu ku ba ndu yabona+ ni kukutiseza bashemi babona ni bo kuku wabona sesi baswanela,+ kakuli kueza cwalo ki nto yeamuheleha ku Mulimu.+
5 Cwale musali yali mbelwa luli yasiilwe asina sesiñwi, usepile Mulimu+ mi utundamena mwa likupo ni litapelo busihu ni musihali.+
6 Kono mbelwa yapila ka kukolwisa takazo yahae ya minyaka ushwile niha pila.
7 Cwale uzwelepili kufa litaelo ze, kuli basike banyazahala.
8 Kaniti haiba mutu hababaleli bahae, mi sihulu ba ndu yahae, yo ulatuzi tumelo mi ufitwa ki mutu yasina tumelo.+
9 Mbelwa abeiwe fa mukoloko haiba ufitelezi lilimo ze 60 za kupepwa, haiba naanyalwanga ki muuna alimuñwi feela,
10 yazibahala ka misebezi yeminde,+ haiba naahulisize bana hande,+ haiba naanani moya wa kuamuhela baenyi,+ haiba naatapisanga mahutu a babakenile,+ haiba naatusanga babanyandile,+ haiba naaineezi kueza musebezi kaufela omunde.
11 Kono usike wabeya limbelwa babali likalibe fa mukoloko, kakuli litakazo zabona za kulobala ni muuna halitibela sebelezo yabona ku Kreste, babata kunyalwa.
12 Mi bakafiwa katulo kabakala kuli basiile tumelo yene babonisa sapili.*
13 Ka nako yeswana baituta ni kusabeleka, banze bahela-hela fa mandu; mi haki kusabeleka feela, kono hape ki basebi mi baikenya mwa litaba za babañwi,+ banze babulela litaba zebasa swaneli kubulela.
14 Hakulicwalo, nilakaza kuli limbelwa babali likalibe banyalwe,+ bapepe bana,+ bababalele ba ndu yabona, basike bafa muhanyezi kolo ya kubanyaza.
15 Mane babañwi sebakeluhile kale kulatelela Satani.
16 Haiba musali yali mulumeli unani banabahabo yena ba limbelwa, atuse limbelwa zeo, kuli puteho isike yaimezwa. Mi cwale puteho ikakona kutusa limbelwa luli.*+
17 Baana-bahulu babazamaisa ka mukwa omunde+ batalimwe kuli balukela kufiwa likute lelituna,+ sihulu babasebeza ka taata mwakubulela ni kuluta.+
18 Kakuli liñolo lili: “Usike watama pulu kayawa kwa mulomo hainze ipula bubeke,”+ ni kuli: “Mubeleki walukela kufiwa tuwelo yahae.”+
19 Usike walumela taba yatamwa muuna-muhulu, konji haipakwa ki lipaki zepeli kamba zetaalu.+
20 Babaswalelela kueza sibi+ ubakalimele+ fapilaa batu kaufela, kuli ibe temuso ku babañwi kaufela.*
21 Nikulaela ka taata fapilaa Mulimu ni Kreste Jesu ni mangeloi aketilwe kuli umamele litaelo ze, kusina saluluti kamba ketululo.+
22 Usike waakufela kubeya mutu mazoho;*+ mi usike waabana mwa libi za babañwi; uipuluke uli yakenile.
23 Utuhele kunwanga mezi feela, kono unwange ni waine yenyinyani kabakala mba yahao ni kukula-kula kwahao.
24 Libi za batu babañwi lizibahala kwa batu kaufela, ili kuisa feela kwa katulo, kono za babañwi zona lito bonahalanga hasamulaho.+
25 Ka nzila yeswana, misebezi yeminde ni yona izibahala kwa batu kaufela+ mi yesazibahali haikoni kupatelelwa feela honacwalo.+
Litaluso ze kwatasi
^ Kamba “limbelwa babatokwile luli”; fo kikuli, babasina yabatusa.
^ Kamba “sepiso yabona yapili.”
^ Kamba “limbelwa babatokwile luli”; fo kikuli, babasina yabatusa.
^ Linzwi ka linzwi, “kuli babañwi kaufela basabe.”
^ Fo kikuli, usike waakufela kuketa mutu.
