2 Malena 24:1-20
24 Mwa mazazi a Joyakimi, Mulena Nebukadenezare+ wa Babilona ataha kuto mulwanisa, mi Joyakimi aba mutangaa hae ka lilimo zetaalu. Kono amufetuhela.
2 Cwale Jehova akala kumulumela limpi za bahapi za Makaladeya,+ Masiria, Mamoabi, ni Maamoni kuli bato mulwanisa. Azwelapili kubaluma kuyo lwanisa Juda kuli baisinye, kulikana ni linzwi la Jehova+ lanaabulezi ka batanga bahae ba bapolofita.
3 Kaniti, taba yeo neiezahezi ku Juda ka taelo ya Jehova, kuli abazwise fapilaa hae+ kabakala libi kaufela zanaaezize Manase,+
4 ni kabakala mali a batu babasina mulatu anaasuluzi,+ kakuli naatalize Jerusalema ka mali a batu babasina mulatu, mi Jehova naasalati kuswalela.+
5 Haili litaba zeñwi za Joyakimi, zona lika kaufela zanaaezize, kikuli halisika ñolwa mwa buka ya litaba za linako za malena ba Juda?+
6 Joyakimi ashwa, mi abulukiwa sina bo kuku wahae;+ mi Joyakini mwanaa hae amuyola fa bulena.
7 Mulena wa Egepita naasika zwa hape mwa naha yahae, kakuli mulena wa Babilona naangile naha kaufela yeneli ya mulena wa Egepita,+ kukalela kwa Mulapo* wa Egepita+ kuyo fita kwa Nuka ya Eufrati.+
8 Joyakini+ naanani lilimo ze 18 hakala kubusa, mi abusa likweli zetaalu inzaa li mwa Jerusalema.+ Libizo la mahe neli Nehushita mwanaa Elinatani wa kwa Jerusalema.
9 Azwelapili kueza zemaswe mwa meeto a Jehova, kulikana ni lika kaufela zanaaezize ndatahe.
10 Mwa nako yeo, batanga ba Mulena Nebukadenezare wa Babilona bataha kuto lwanisa Jerusalema, mi baambeka muleneñi.+
11 Mulena Nebukadenezare wa Babilona ataha kwa muleneñi, batanga bahae inze bauambekile.
12 Mulena Joyakini wa Juda azwela ku mulena wa Babilona,+ hamoho ni mahe, batanga bahae, makwambuyu bahae, ni manduna bahae ba kwa lapa;+ mi mulena wa Babilona amuhapa ka silimo sabu 8 sa puso yahae.+
13 Mi ashimba bufumu kaufela bwa mwa ndu ya Jehova ni bufumu bwa mwa ndu ya mulena.+ Atubaka lisebeliso kaufela za gauda zanaaezize Salumoni mulena wa Isilaele mwa tempele ya Jehova.+ Kwaezahala sina mwanaapolofitezi Jehova.
14 Aisa mwa buhapiwa Jerusalema kaufela, makwambuyu kaufela,+ lindwalume zemaata kaufela, ni likwala kaufela za misebezi ya mazoho ni bambuti* kaufela+—naaisize batu ba 10,000 mwa buhapiwa. Nekusika siyala mutu konji batu ba naha bane babotanile hahulu.+
15 Aisa Joyakini+ cwalo mwa buhapiwa kwa Babilona;+ aisa ni mahe mulena, basali ba mulena, manduna bahae ba kwa lapa, ni baana babakutekeha mwa naha, abazwisa mwa Jerusalema ni kubaisa mwa buhapiwa kwa Babilona.
16 Hape mulena wa Babilona aisa mwa buhapiwa kwa Babilona lindwalume kaufela, ze 7,000, hamoho ni likwala za misebezi ya mazoho ni bambuti,* ba 1,000, ili baana babamaata ni babalutilwe ndwa kaufelaa bona.
17 Mulena wa Babilona ayolisa Matania fa bulena, yena munyanaa ndatahe Joyakini,+ mwa situlo sahae, mi acinca libizo lahae, amubeya libizo la Zedekia.+
18 Zedekia naanani lilimo ze 21 hakala kubusa, mi abusa lilimo ze 11 inzaa li mwa Jerusalema. Libizo la mahe neli Hamutali+ mwanaa Jeremia wa kwa Libina.
19 Azwelapili kueza zemaswe mwa meeto a Jehova, kulikana ni lika kaufela zanaaezize Joyakimi.+
20 Neli kabakala buhali bwa Jehova, litaba zeo hane liezahezi mwa Jerusalema ni mwa Juda, kufitela abazwisa fapilaa hae.+ Mi Zedekia afetuhela mulena wa Babilona.+
Litaluso ze kwatasi
^ Mubone Litaluso za Manzwi.
^ Kamba mwendi, “bayahi ba mamota.”
^ Kamba mwendi, “bayahi ba mamota.”
