2 Samuele 5:1-25
5 Hamulaho wa nako, masika kaufela a Isilaele ataha ku Davida kwa Hebroni+ mi ato mubulelela kuli: “Bona! Luna ni wena lu lisapo lililiñwi ni nama iliñwi.*+
2 Mwa nako ya kwamulaho, Saule hanaali mulenaa luna, ki wena yanaaetelela Maisilaele mwa lindwa zabona.*+ Mi Jehova naaize ku wena: ‘Ukazamaisa batu baka, bona Maisilaele, mi ukaba mueteleli wa Isilaele.’”+
3 Ka mukwa ocwalo, baana-bahulu kaufela ba Isilaele bataha ku mulena mwa Hebroni, mi Mulena Davida aeza tumelelano ni bona+ mwa Hebroni fapilaa Jehova. Kiha batoza Davida kuli abe mulena wa Isilaele.+
4 Davida naanani lilimo ze 30 hakala kubusa, mi naabusize ka lilimo ze 40.+
5 Ka nako yanaali mwa Hebroni, Davida naabusize Juda ka lilimo ze 7 ni likweli ze 6, mi mwa Jerusalema,+ naabusize Isilaele kaufela ni Juda ka lilimo ze 33.
6 Mi mulena ni baana bahae baya kwa Jerusalema kuyo lwanisa Majebusi+ bane bayahile mwa naha. Majebusi bao basheununa Davida, bali: “Hauna kukena mo! Mane ukalelekwa ki libofu ni lihole.” Nebaize: ‘Davida haana kufita kwanu.’+
7 Nihakulicwalo, Davida ahapa sibaka sa silelezo sa Sione, sese sibizwa Muleneñi wa Davida+ cwale.
8 Fa lizazi leo, Davida ali: “Batu babaka lwanisa Majebusi baswanela kufita ka liabwa la mezi kuli bayo bulaya ‘lihole ni libofu’ babatoilwe ki Davida!” Ki lona libaka hakubulelwanga kuli: “Libofu ni lihole halina kukena mwa sibaka se.”
9 Davida ayaha mwa muleneñi osilelelizwe wo, mi muleneñi wo neubizwa* Muleneñi wa Davida; mi Davida akalisa kuyaha mamota ni miyaho yemiñwi kukalela fa Mulunda*+ kutaha mwa muleneñi.+
10 Davida azwelapili kuba ni maata,+ mi Jehova Mulimu wa limpi naali ni yena.+
11 Mulena Hiramu+ wa Tire aluma batu ku Davida, amulumela ni likota za sidare,+ ni babeti, ni bacakuli ba macwe a kuyahisa mamota, mi bakala kuyahela Davida ndu.*+
12 Mi Davida aziba kuli Jehova umutiisize kuli abe mulena wa Isilaele+ mi upahamisize mubuso wahae+ kabakala sicaba sahae sa Isilaele.+
13 Davida hasaakutile kuzwa kwa Hebroni, aikungela liendi+ zeñwi ni kunyala basali babañwi mwa Jerusalema, mi aba ni bana babañwi babashimani ni babasizana.+
14 A ki ona mabizo a bana bahae bane bapepezwi mwa Jerusalema neli: Shamua, Shobabi, Natani,+ Salumoni,+
15 Ibari, Elishua, Nefegi, Jafia,
16 Elishama, Eliada, ni Elifeleti.
17 Mafilisita habautwa kuli Davida utozizwe kuba mulena wa Isilaele,+ kaufelaa bona bataha kuto mubata.+ Mi Davida hautwile taba yeo, ayo ipata mwa sibaka sa silelezo.+
18 Mi Mafilisita bao bato bena-bena mwa Musindi* wa Refaimi.+
19 Davida abuza Jehova,+ ali: “Kana naswanela kuyo lwanisa Mafilisita? Kana uka bafa mwa mazoho aka?” Jehova aalaba Davida, ali: “Zamaya, kakuli luli nika bafa mwa mazoho ahao.”+
20 Ka mukwa ocwalo, Davida ataha mwa Baale-perazimi, mi abulaya Mafilisita bane bali mwateñi. Hamulaho ali: “Jehova utuzi lila zaka,+ upunyize lisuba mwahalaa bona sina lisuba lelitahisizwe ki mezi.” Ki lona libaka hanaabeile sibaka seo libizo la Baale-perazimi.*+
21 Mafilisita bayubeka milimu yabona ya maswaniso mwa sibaka seo, mi Davida ni baana bahae baya ni milimu ya maswaniso yeo.*
22 Hasamulaho, Mafilisita bataha hape, bato bena-bena mwa Musindi* wa Refaimi.+
23 Davida hape abuza Jehova, kono amualaba, ali: “Usike wayo bakatanyeza. Kono ubapotolohe kwamulaho, uyo bataseza fapilaa macacani a baaka.
24 Mi hauka utwa mulumo outwahala inge wa batu babacaula fahalimwaa macacani a baaka, uunge muhato kapili-pili, kakuli Jehova uka kuzamaya kwapili kuyo bulaya mpi ya Mafilisita.”
25 Davida aeza zanaa mulaezi Jehova, mi abulaya Mafilisita+ kukalela mwa Geba+ kuyo fita mane ni kwa Gezeri.+
Litaluso ze kwatasi
^ Kamba “Lu banabahabo wena ka sipepo.”
^ Linzwi ka linzwi, “yanaazwisa ni yanaatisa Isilaele.”
^ Kamba mwendi, “mi aubiza.”
^ Kamba “Milo.” Leo ki linzwi la Siheberu lelitalusa “kuubela.”
^ Kamba “ndu ya bulena.”
^ Kamba “Libala.”
^ Lelitalusa “Mupunyi Yomutuna wa Masuba.”
^ Kubonahala kuli Davida ni baana bahae nebaangile milimu ya maswaniso yeo ni kuyo isinya. Mubone 1Mk 14:12.
^ Kamba “Libala.”
