Amosi 2:1-16
2 Jehova sabulela ki se, uli:‘“Kabakala milatu* yemilaalu ya Moabi,+ mane ki yemine, hanina kucinca muhupulo waka wa kumufa koto,Kakuli naacisize masapo a mulena wa Edomo kuli afumane laimu.
2 Kabakaleo, nikalumela mulilo mwa Moabi,Mi ukacisa litawala zesilelelizwe za Kerioti;+Moabi ukashwa ka nako ya mifilifili,Ka mukosi wa ndwa, ka mulumo wa lunaka.+
3 Nikazwisa mubusi* mwahalaa haeMi nikabulaya manduna bahae kaufela hamoho ni yena,”+ kubulela Jehova.’
4 Jehova sabulela ki se, uli:‘Kabakala milatu yemilaalu ya Juda,+ mane ki yemine, hanina kucinca muhupulo waka wa kumufa koto,Kabakala kuli nebahanile mulao* wa Jehova,Ni kabakala kuli nebasika mamela litaelo zahae;+Kono bakelusizwe ki litaba za buhata zeswana, zene balatelezi bo kuku wabona.+
5 Kabakaleo, nikalumela mulilo mwa Juda,Mi ukacisa litawala zesilelelizwe za Jerusalema.’+
6 Jehova sabulela ki se, uli:‘Kabakala milatu yemilaalu ya Isilaele,+ mane ki yemine, hanina kucinca muhupulo waka wa kumufa koto,Kakuli balekisa batu babalukile kuli bafumane silivera,
Mi balekisa babotana kuli bafumane makatulo.+
7 Bahatikela litoho za babotana mwa liluli la lifasi,+Mi batiba nzila ya babaishuwa.+
Mutu ni ndatahe balobala ni musizana alimuñwi,Basilafaza libizo laka lelikenile.
8 Balobala fa liapalo zene baangile sina swalele,+ kwatuko ni lialetare+ kaufela;Mi waine yebanwela mwa ndu* ya milimu yabona neifumanwi kwa batu bane balifisize.’
9 ‘Kono ki na yanaayundisize Maamori fapilaa bona,+Bane bali babatelele sina likota za sidare ni babamaata sina likota za oke;Nenisinyize miselo yabona kwahalimu ni mibisi yabona kwatasi.+
10 Ki na yanaa mizusize mwa naha ya Egepita,+Mi namizamaisa mwa lihalaupa ka lilimo ze 40,+Kuli muluwe naha ya Maamori.
11 Naketa babañwi kwa bana bamina kuli babe bapolofita+Ni babañwi kwa micaha bamina kuli babe Manazareni.+
Kana haki cwalo, mina sicaba sa Isilaele?’ kubulela Jehova.
12 ‘Kono mwazwelapili kufa Manazareni waine kuli banwe,+Mi mwalaela bapolofita kuli: “Musike mwapolofita.”+
13 Cwale nika mitubela mwa sibaka samina,Sina koloi yelongile bubeke bobusazo kutulwa moitubela lika zekwatasaa yona.
14 Yanani lubilo hakuna kwakasabela,+Yamaata haana kuba ni maata ahae,Mi hakuna ndwalume yakapilisa bupilo* bwahae.
15 Yalwana ka buta ukasaba,Yanani lubilo haana kubaleha,Mi mupahami wa pizi haana kupilisa bupilo* bwahae.
16 Nihaiba ndwalume* yabundume hahuluUkamata ali mapunu fa lizazi leo,’+ kubulela Jehova.”
Litaluso ze kwatasi
^ Kamba “lifoso.”
^ Linzwi ka linzwi, “muatuli.”
^ Kamba “taelo.”
^ Kamba “tempele.”
^ Kamba “moyo.”
^ Kamba “moyo.”
^ Kamba “yatiile pilu.”
