Amosi 7:1-17
7 Ki se sanaa nibonisize Jehova Mulena Yapahami ka Kufitisisa: Hamubone! Naatahisize nziye yezamaya sikutu ka nako yelikala kumela limela za mafelelezo.* Zeo neli zona limela za mafelelezo hamulaho wa kumwetiwa kwa bucwañi bwa mulena.
2 Nziye hase ifelize kuca limela kaufela mwa naha, nali: “Wena Jehova Mulena Yapahami ka Kufitisisa, hakuswalele!+ Jakobo ukapunyuha cwañi?* Kakuli wafokola!”+
3 Cwale Jehova atalima sinca* taba yeo.+ Jehova ali: “Taba yeo haina kuezahala.”
4 Ki se sanaa nibonisize Jehova Mulena Yapahami ka Kufitisisa: Hamubone! Jehova Mulena Yapahami ka Kufitisisa, naatahisize koto ka mulilo. Mulilo wo wacisa buliba bwa mezi amañata, mi wacisa kalulo yeñwi ya naha.
5 Cwale nali: “Wena Jehova Mulena Yapahami ka Kufitisisa, usike watahisa koto ye.+ Jakobo ukapunyuha cwañi?* Kakuli wafokola!”+
6 Cwale Jehova atalima sinca* taba yeo.+ Jehova Mulena Yapahami ka Kufitisisa, ali: “Taba yeo ni yona haina kuezahala.”
7 Ki se sanaa nibonisize: Hamubone! Jehova naayemi fa limota lene liyahilwe ka muhala wa kumishalisa limota, mi mwa lizoho lahae nekunani muhala wa kumishalisa limota.
8 Jehova kihaa li ku na: “Amosi, kiñi seubona?” Mi nali: “Nibona muhala wa kumishalisa limota.” Cwale Jehova ali: “Bona! Nibeya muhala wa kumishalisa limota mwahalaa sicaba saka sa Isilaele. Hanisana kubaswalela.+
9 Libaka zelumbile za Isaka+ likasinyiwa, mi libaka zekenile za Isilaele likashandaulwa;+ mi nikato lwanisa ba ndu ya Jeroboami ka mukwale.”+
10 Muprisita Amazia wa kwa Betele+ alumela Mulena Jeroboami+ wa Isilaele liñusa le, ali: “Amosi wakufetuhela mwahalaa ba ndu ya Isilaele.+ Naha haisakona kutiyela manzwi ahae kaufela.+
11 Kakuli Amosi uli: ‘Jeroboami ukashwa ka mukwale, mi Isilaele ukaiswa mwa buhapiwa kuzwa mwa naha yahae.’”+
12 Cwale Amazia ali ku Amosi: “Wena muboni wa lipono, zamaya, umatele kwa naha ya Juda, uyo belekela sinkwa sahao* kwateñi, mi uyo polofitela kwateñi.+
13 Kono utuhele kupolofitela kwa Betele hape,+ kakuli ki sibaka sa mulena sesikenile+ ni ndu ya mubuso.”
14 Cwale Amosi aalaba Amazia, ali: “Nenisi mupolofita, nihaiba mwanaa mupolofita; kono nenili mulisana+ mi nenibabalela likota za feiga za sikomora.*
15 Kono Jehova aniinga, anizwisa kwa musebezi wa kulatelela mutapi, mi Jehova ali ku na: ‘Zamaya, uyo polofitela sicaba saka sa Isilaele.’+
16 Cwale utwa linzwi la Jehova: ‘Wena ubulela kuli: “Usike wapolofita litaba za kulwanisa Isilaele,+ mi usike wakutaza+ litaba za kulwanisa ba ndu ya Isaka.”
17 Kabakaleo, Jehova sabulela ki se, uli: “Musalaa hao ukaba lihule mwa muleneñi, mi bana bahao babashimani ni babasizana bakabulaiwa ka mukwale. Naha yahao ikaabiwa ka muhala wa kumishalisa, mi wena ukayo shwela mwa naha yesika kena; mi Isilaele ukaiswa mwa buhapiwa kuzwa mwa naha yahae.”’”+
Litaluso ze kwatasi
^ Fo kikuli, mwa January ni February.
^ Linzwi ka linzwi, “ukayema cwañi?”
^ Kamba “aikutwa bumaswe ka.”
^ Linzwi ka linzwi, “ukayema cwañi?”
^ Kamba “aikutwa bumaswe ka.”
^ Linzwi ka linzwi, “uyo cela sinkwa sahao.”
^ Kamba “nenipunyanga lifeiga za sikomora.”
