Baatuli 7:1-25
7 Cwale Jerubaale, yena Gidioni,+ ni batu kaufela bane bali ni yena, bapakela ni kuyo toma mafulo kwa Liweluwelu la Harodi; mafulo a Mamidiani naali kwa mutulo wa mafulo a Gidioni, fa lilundu la More, mwa musindi.*
2 Cwale Jehova abulelela Gidioni kuli: “Batu babali ni wena ki babañata hahulu, hanikoni kufa Mamidiani mwa mazoho abona.+ Kakuli Isilaele akasuhana aitundumuna fapilaa ka, ali: ‘Ki na muñi yaitamulezi.’+
3 Cwale uzibise batu kuli: ‘Yena kaufela yasaba kamba yangangama, akutele kwa hae.’”+ Mi Gidioni alika batu cwalo. Kabakaleo, batu ba 22,000 bakutela kwa hae, mi kwasiyala ba 10,000.
4 Kono Jehova abulelela Gidioni kuli: “Batu basali babañata. Ubashetumukiseze kwa mezi kuli niyo kulikela bona kwateñi. Hanika kubulelela kuli: ‘Mutu yo, ukaya ni wena,’ yena yo uswanela kuya ni wena, kono hanika kubulelela kuli: ‘Mutu yo haana kuya ni wena,’ kipeto mutu yo haswaneli kuya ni wena.”
5 Gidioni kihaa shetumukiseza batu kwa mezi.
Cwale Jehova abulelela Gidioni kuli: “Ukauhanye batu kaufela babakapa mezi ka malimi abona sina nja, ku babakubama ka mañwele habanwa mezi.”
6 Palo ya baana bane banwa mezi ka kuisa mazoho abona kwa mulomo, neieza 300. Babañwi kaufela nebakubami ka mañwele abona kunwa mezi.
7 Cwale Jehova abulelela Gidioni kuli: “Nika kulamulela ka baana ba 300 babanwile mezi ka mazoho, mi nika kufa Mamidiani.+ Kono batu babañwi kaufela bakutele kwa hae.”
8 Cwale hase baangile mufaho ni manaka kwa batu, afundula baana babañwi kaufela ba Isilaele kuli bakutele kwa hae, asiyala feela ni baana ba 300. Mafulo a Mamidiani naali kwatasaa bona mwa libala.+
9 Ka bona busihu bo, Jehova amubulelela kuli: “Zuha, uyo lwanisa mafulo, kakuli nikufile ona.+
10 Kono haiba wasaba kueza cwalo, ushetumukele kwa mafulo ni Pura sikombwa sahao.
11 Uyo utwa zebabulela, mi hasamulaho ukaba ni bundume* bwa kubalwanisa.” Hautwa cwalo, yena ni Pura sikombwa sahae bashetumukela kwa mandamino a mafulo a masole.
12 Cwale Mamidiani ni Maamaleke ni batu kaufela ba kwa upa+ nebacabukile mwa libala inge nziye, likamele zabona nelisa konahali kubalwa,+ neli zeñata hahulu sina mushabati wa fa likamba la liwate.
13 Cwale Gidioni afita kwa mafulo, mi nekunani muuna yanaakandekela mulikanaa hae tolo yanaalolile, ali: “Ye ki yona tolo yenilolile. Nekunani sinkwa sa mabele sa laundi sene sipindumukela mwa mafulo a Mamidiani. Safita fa tende yeñwi, sato inata maswe kuli mane yawa.+ Safetula tende, mi tende yalapalala fafasi.”
14 Mulikanaa hae hautwa cwalo, ali: “Tolo yeo italusa feela mukwale wa Gidioni+ mwanaa Joasi, muuna wa Muisilaele. Mulimu umufile Mamidiani ni mafulo abona kaufela.”+
15 Gidioni asautwa feela muuna yo hakandeka tolo yeo ni hautwa taluso yayona,+ akubama fafasi kulapela. Hasamulaho akutela mwa mafulo a Isilaele mi ali: “Hamuyeme, kakuli Jehova umifile mafulo a Mamidiani.”
16 Cwale aalula baana ba 300 mwa likwata zetaalu mi afa yomuñwi ni yomuñwi wabona lunaka+ ni piza yetuna yesina sesiñwi kwandaa lumonyi lolubeilwe mwateñi.
17 Kihona ababulelela kuli: “Munitalimele mi munilikanyise ka tokomelo. Hanika fita kwa mandamino a mafulo, muswanela kueza monika ezeza kaufela.
18 Hanika liza lunaka, na hamoho ni babali ni na, ni mina mulize manaka munze mupotolohile mafulo kaufela, mi muhuweleze muli: ‘Ndwa ki ya Jehova ni Gidioni!’”
19 Gidioni ni baana ba 100 bane bali ni yena bafita kwa mandamino a mafulo kwa makalelo a mutonelo wa fahalaa busihu,* balibeleli hane basazo yapana. Baliza manaka+ ni kutuba lipiza zetuna za mezi zene basweli mwa mazoho.+
20 Cwale likwata zetaalu zaliza manaka ni kutuba lipiza zetuna. Baswala mamonyi mwa mazoho abona a nzohoto ni kuliza manaka anali mwa mazoho abona a silyo mi bahuweleza, bali: “Mukwale wa Jehova ni wa Gidioni!”
21 Mwahalaa nako yeo kaufela, mutu ni mutu ayema mwa sibaka sahae kupotoloha mafulo kaufela, mi masole kaufelaa bona bamata, babaleha inze bahuwa.+
22 Baana ba 300 bazwelapili kuliza manaka, mi Jehova atahisa kuli batu bafetuhelane ka mikwale yabona mwa mafulo kaufela;+ mi masole babaleha kuyo fita kwa Beti-shita, kuyo ya cwalo ni kwa Zerera, mane ni kuyo fita kwa milulwani ya Abele-mehola+ bukaufi ni Tabati.
23 Mi baana ba Isilaele babiziwa kuli bato kopana hamoho kuzwa mwa naha ya Nafetali, ni ya Asere, ni naha kaufela ya Manase,+ mi bandongwama Mamidiani.
24 Gidioni aluma linumwana mwa naha kaufela ya malundu ya Efraimi kuyo babulelela kuli: “Mushetumuke muyo lwanisa Mamidiani, mi mutibe masilelo kaufela kuyo fita mane kwa Beti-bara ni kwa Jordani.” Mi baana kaufela ba Efraimi bakopana hamoho, mi batiba masilelo kuyo fita mane kwa Beti-bara ni kwa Jordani.
25 Hape baswala manduna bababeli ba Mamidiani, bo Orebu ni Zeebu; babulaela Orebu fa licwe la Orebu,+ mi babulaela Zeebu fa silubelo sa waine sa Zeebu. Bazwelapili kundongwama Mamidiani,+ batiseza Gidioni toho ya Orebu ni ya Zeebu mwa sibaka sa Jordani.
Litaluso ze kwatasi
^ Kamba “libala.”
^ Linzwi ka linzwi, “mazoho ahao akatiya.”
^ Okala ibato ba ka 10 ya busihu kuisa ku bo ma 2 ya busihu.
