Ezekiele 2:1-10
2 Cwale ali ku na: “Mwanaa mutu,* yema ka mahutu ahao kuli nibulele ni wena.”+
2 Hasabulezi ni na, moya wakena ku na mi waniyemisa ka mahutu aka+ kuli niutwe yabulela ni na.
3 Azwelapili kubulela ni na, ali: “Mwanaa mutu, nikuluma kwa batu ba Isilaele,+ kwa macaba a bakwenuheli aanikwenuhezi.+ Bona ni bo kuku wabona banifoselize kutofita ni la kacenu le.+
4 Nikuluma kwa bana babasa utwi,* ba lipilu zetaata,+ mi uyo li ku bona: ‘Ki se sabulela Jehova Mulena Yapahami ka Kufitisisa.’
5 Haili bona, ibe kuli bakautwa kamba bakahana kuutwa—kakuli ki lusika lwa bakwenuheli+—bakaziba luli kuli nekubanga ni mupolofita mwahalaa bona.+
6 “Kono wena mwanaa mutu, usike wabasaba,+ mi usike wasaba manzwi abona, niha upotolohilwe ki mikona ni miutwa*+ ni kupila mwahalaa tubanze. Usike wasaba manzwi abona,+ mi usike wambemukiswa ki lipata zabona,+ kakuli ki lusika lwa bakwenuheli.
7 Ubabulelele manzwi aka, ibe kuli bakautwa kamba kutokwa, kakuli ki sicaba sa bakwenuheli.+
8 “Kono wena mwanaa mutu, uutwe seni kubulelela. Usike waba mukwenuheli sina lusika lo lwa bakwenuheli. Atama mi uce seni kufa.”+
9 Hanitalima, nabona lizoho leliotolohela ku na,+ mi nabona mwa lizoho leo muputo* oñozwi.+
10 Hauputulula fapilaa ka, neuñozwi mwahali ni fande.+ Mwa muputo wo, nekuñozwi lipina za malilo ni litaba za maswabi ni za kubokolola.+
Litaluso ze kwatasi
^ “Mwanaa mutu”; pulelo ye ifumaneha ha 93 mwa buka ya Ezekiele, mi lo ki lona lwapili.
^ Kamba “babaomelezi lipata.”
^ Kamba mwendi, “niha upotolohilwe ki batu ba lipilu zetaata ni babaswana sina lika zekutaba.”
^ Kamba “muputo wa buka.”
