Hosea 1:1-11
1 Linzwi la Jehova lataha ku Hosea* mwanaa Beeri mwa mazazi a Oziasi,+ Jotami,+ Akazi,+ ni Ezekiasi,+ malena ba Juda,+ ni mwa mazazi a Jeroboami+ mwanaa Joasi,+ mulena wa Isilaele.
2 Jehova hakalisa kubulela manzwi ahae ka Hosea, Jehova ali ku Hosea: “Zamaya, uyo nyala musali wa lihule* mi ube ni bana babapepilwe ka buhule,* kakuli kabakala buhule* naha ituhezi kulatelela Jehova.”+
3 Cwale aya mi ayo nyala Gomere mwanaa Dibilaimi, mi aitwala ni kupepa mwana wamushimani.
4 Cwale Jehova ali ku yena: “Umubeye libizo la Jizireele,* kakuli nituha nifa mulatu ba ndu ya Jehu+ kabakala likezo za kusulula mali kwa Jizireele, mi nikafelisa puso ya ba ndu ya Isilaele.+
5 Ka lizazi leo, nikalobela buta bwa Isilaele mwa Musindi* wa Jizireele.”
6 Hape aitwala mi apepa mwana wamusizana. Mi Mulimu ali ku Hosea: “Umubeye libizo la Lo-ruhama,* kakuli hanisana kushemuba+ ba ndu ya Isilaele kabakala kuli nika baleleka.+
7 Kono nikashemuba ba ndu ya Juda,+ mi nika bapilisa ka Jehova Mulimu wabona;+ hanina kubapilisa ka buta kamba ka mukwale kamba ka ndwa kamba ka lipizi kamba ka bapahami ba lipizi.”+
8 Hasaakwisize Lo-ruhama, aitwala mi apepa mwana wamushimani.
9 Cwale Mulimu ali: “Umubeye libizo la Lo-ami,* kakuli hamu sicaba saka mi hanina kuba Mulimu wamina.
10 “Mi palo ya sicaba* sa Isilaele ikalikana ni mushabati wa liwate, osakoni kupimiwa kamba kubaliwa.+ Mi mwa sibaka mone babulelezwi kuli: ‘Hamu sicaba saka,’+ bakabulelelwa kuli: ‘Bana ba Mulimu yapila.’+
11 Mi batu ba mwa Juda ni Isilaele bakakopanyiwa hamoho inze baswalisani+ mi baka iketela mueteleli alimuñwi ni kuzwa mwa naha, kakuli lizazi la Jizireele+ likaba lelituna.
Litaluso ze kwatasi
^ Hosea ki kupumela libizo la Hoshaya, lelitalusa “Yapilisizwe ki Jah; Jah Upilisize.”
^ Kamba “yapila ka buitamaeli.”
^ Kamba “buitamaeli.”
^ Kamba “buitamaeli.”
^ Lelitalusa “Mulimu Ukacala Peu.”
^ Kamba “Libala.”
^ Lelitalusa “Yasika Shemubiwa.”
^ Lelitalusa “Haki Sicaba Saka.”
^ Linzwi ka linzwi, “bana.”
