Isaya 13:1-22
13 Ki ye katulo ya Babilona+ yanaaboni Isaya+ mwanaa Amozi mwa pono:
2 “Muyemise sisupo*+ fa lilundu la macwe.
Mubahuweleze, mubakobete ka lizoho,Kuli bato kena mwa minyako ya batu babakutekeha.
3 Nifile taelo kwa batu beniketile.*+
Nibizize lindwalume zaka kuli libonise buhali bwaka,Mi banyakalala ka kuikuhumusa.
4 Amuteeleze! Kunani sicaba mwa malundu;Siluma sina batu babañata!
Amuteeleze! Kuutwahala siyongili sa mibuso,Sa macaba akopani hamoho!+
Jehova wa limpi ukubukanya mpi kuli iye kwa ndwa.+
5 Bazwa kwa naha yakwahule,+Kwa mafelelezo a mahalimu,Ki Jehova ni lilwaniso za buhali bwahae,Bataha kuto sinya lifasi kaufela.+
6 Amulile, kakuli lizazi la Jehova lifakaufi!
Likataha sina sinyeho yezwa ku Yamaata Kaufela.+
7 Ki lona libaka mazoho kaufela hakafokola,Ni pilu ya mutu kaufela haika shengunukiswa ki sabo.+
8 Batu baziyelehile.+
Banyakaula mi bautwa butuku,Sina musali yautwa butuku bwa lupepo.
Batalimana ka luwewe,Lipata zabona libonisa kuli baziyelehile.
9 Hamubone! Lizazi la Jehova lataha,Ki lelisituhu, ili lelisabisa ni la buhali bobutuka,Kuto fetula naha kuba nto yesabisa,+Ni kuto yundisa baezalibi ba mwa naha.
10 Kakuli linaleli za mahalimu ni litopa za linaleli*+ ze ku onaHalina kubenyisa liseli lazona;Lizazi halika pazula likaunsufala,Mi kweli haina kubenyisa liseli layona.
11 Nikazekisa lifasi la batu kabakala bumaswe bwabona,+Ni kuzekisa babamaswe kabakala bufosi bwabona.
Nikafelisa buikuhumuso bwa babaipahamisa,Mi nikakokobeza bahateleli babaikuhumusa.+
12 Nikatahisa kuli batu bafukuzehe kufita gauda yekenisizwe,+Bafukuzehe kufita gauda ya kwa Ofiri.+
13 Ki lona libaka hanika ngangamisa mahalimu,Mi lifasi likanyanganya, lizwe mwa sibaka salona+Kabakala mabifi a Jehova wa limpi ka lizazi la buhali bwahae bobutuka.
14 Sina kamunda kakazumiwa, ni sina mutapi osina yaukubukanya,Yomuñwi ni yomuñwi ukakutela kwa sicaba sahabo;Yomuñwi ni yomuñwi ukasabela kwa naha yahabo.+
15 Mutu kaufela yakafumanwa ukatabiwa,Mi mutu kaufela yakaswalwa ukabulaiwa ka mukwale.+
16 Bana babona bakalobakiwa fapilaa meeto abona,+Tutu ya mwa mandu abona ikahapiwa,Mi basali babona bakaswalwa likalala.
17 Hamubone, nibatiseza Mamede kuli bato balwanisa,+Bona babasa ngi silivera kuli ki sesiñwiNi babasa tabeli gauda.
18 Buta bwabona bukabulaya mitangana;+Habana kushwela makeke limbututuMi habana kushemuba banana.
19 Mi Babilona, ona mubuso omunde hahulu mwahalaa* mibuso,+Ili mubuso wa Makaladeya obuheha, obaikuhumusa ka ona,+Ukaswana sina Sodoma ni Gomora nako yelisinyiwa ki Mulimu.+
20 Hausana kuyahiwa nikamuta,Mi hakuna babaka pila mwateñi mwa masika kaufela a kwapili.+
Hakuna Muarabe yakatoma tende yahae mwateñi,Mi hakuna balisana babaka pumuliseza mwateñi mitapi yabona.
21 Libupiwa za mwa lihalaupa likabuta mwateñi;Mandu abona akatala masikita.
Limpye likaina mwateñi,+Mi lipuli za mwa naheñi* likatula-tula mwateñi.
22 Libupiwa zebokololanga likalilela mwa litawala zaona,Mi mawawa akalilela mwa mandu amande a silena a mwateñi.
Nako yaona isutelezi, mi mazazi aona haana kuekezwa.”+
Litaluso ze kwatasi
^ Kamba “musumo wa sisupo.”
^ Linzwi ka linzwi, “batu baka benikenisize.”
^ Linzwi ka linzwi, “ni Likesile,” mwendi ili kutalusa Orioni ni litopa za linaleli zeipotolohile.
^ Kamba “mubuso okabisa.”
^ Kamba mwendi, “Mi madimona aswana sina lipuli.”