Isaya 46:1-13
46 Bele uinamezi fafasi,+ Nebo uobami.
Maswaniso ayona abeiwa fa lifolofolo, fa lipelesa,+Sina mushimbo oimeza lifolofolo zekatezi.
2 Iobami ni kuinamela fafasi hamoho;Haikoni kulamulela mishimbo yayona,*Mi yona kasibili iiswa mwa buhapiwa.
3 “Hamu niteeleze, mina ba ndu ya Jakobo, ni mina kaufela babasiyezi ku ba ndu ya Isilaele,+Mina benitusize kuzwa fomupepelwa ni benilwezi kuzwa fomuzwela mwa mba.+
4 Nikaba yaswana kufitela musupala;+Nikazwelapili kumilwala kufitela muba ni limbi.
Nika mishimba ni kumilwala ni kumilamulela, sina moseniezelize.+
5 Ki mañi yemuka niswanisa ni yena kamba kunilikanya ni yena kamba kunibapisa ni yena,+Ilikuli luswane?+
6 Kunani batu babazwisa gauda mwa sikwama sabona;Baweita silivera fa sikala.
Balifa mumbuti, mi uieza mulimu.+
Cwale bakubama ni kuwiseza lipata fafasi, mi baulapela.*+
7 Baulwala fa maheta abona;+Baushimba ni kuyo utoma mwa sibaka saona, mi uyema cwalo mwateñi.
Hauzwi mwa sibaka saona.+
Bahuweleza ku ona, kono haualabi;Haukoni kulamulela mutu mwa ziyezi.+
8 Muhupule zeo, mi mube ni bundume.
Muise pilu kwateñi, mina lifosi.
9 Muhupule lika za kwamulaho* za kwakale,Kuli ki na Mulimu, mi hakuna yomuñwi.
Ki na Mulimu, mi hakuna yaswana ni na.+
10 Nipolofita mafelelezo a taba isali kwa makalelo,Mi kuzwa kwakale, nipolofita lika zesika ezwa kale.+
Nili: ‘Mulelo waka ukatiya,+Mi nikaeza senilata kaufela.’+
11 Nibiza nyunywani yeca nama kuzwa kwa mapazulelo a lizazi,*+Kuzwa kwa naha ye kwahule, nibiza mutu yakapeta mulelo waka.+
Senibulezi ki sona senika eza.
Mi senilelile ki sona senika peta.+
12 Hamu niteeleze, mina ba lipilu zetaata,*Mina babakwahule ni kuluka.
13 Nitisize kuluka kwaka fakaufi;Hakuyo kwahule,Mi kupilisa kwaka hakuna kuliyeha.+
Nikatisa puluso mwa Sione, ni kanya yaka mwa Isilaele.”+
Litaluso ze kwatasi
^ Fo kikuli, maswaniso alwesizwe fa lifolofolo.
^ Linzwi ka linzwi, “baukubamela.”
^ Linzwi ka linzwi, “zapili.”
^ Kamba “kwa upa.”
^ Linzwi ka linzwi, “zemaata.”
