Isaya 49:1-26
49 Hamuniteeleze, mina lioli,Mi muutwe, mina macaba a kwahule.+
Jehova unibizize nisika pepwa kale.*+
Ubizize libizo laka kuzwa nako yenenili mwa mba ya bo ma.
2 Uezize mulomo waka kuli ube sina mukwale oshengile;Unipatile mwa muluti wa lizoho lahae.+
Uniezelize lisho lelishengile;Anipata mwa sipusu sahae sa masho.
3 Ali ku na: “U mutangaaka, wena Isilaele,+Yenika bonisa kanya yaka ka yena.”+
4 Kono nali: “Nisebelize kusatusi sesiñwi.
Maata aka niasinyelize ku zesiyo, zesatusi sesiñwi.
Kono katulo yaka i ku Jehova,*Mi lituwelo* zaka li ku Mulimu waka.”+
5 Mi cwale Jehova, Yena yanaa nibupile mwa mba sina mutangaa hae,Unilaezi kuli nikutiseze Jakobo ku yena,Ilikuli Isilaele akopanele ku yena.+
Nikakutekiwa mwa meeto a Jehova,Mi Mulimu waka ukaba maata aka.
6 Mi ali: “Hakusika likana hauli mutangaakaKuli uzuse masika a JakoboNi kukutisa babasilelelizwe ba Isilaele.
Hape nikufile kuli ube liseli la macaba,+Ilikuli kupilisa kwaka kuyo fita ni kwa mafelelezo a lifasi.”+
7 Ki se sabulela Jehova, Muliululi wa Isilaele, Yakenile+ wahae, ku yakendilwe,+ yatoilwe ki sicaba, mutangaa babusi, uli:
“Malena bakabona mi bakayema,Mi manduna bakakubamaKabakala Jehova, yasepahala,+Yakenile wa Isilaele, yena yakuketile.”+
8 Jehova sabulela ki se, uli:
“Neni kualabile ka nako ya kukushemuba,+Nenikutusize ka lizazi la kukupilisa;+Nazwelapili kukusileleza kuli nikufe sina tumelelano mwahalaaka ni sicaba,+Kuli ulukise naha,Kuli ubaluwise lianda zabona zesinyehile,+
9 Kuli ubulelele mapantiti, uli: ‘Hamuzwe mo!’+
Ni babali mwa lififi kuli+ ‘Hamuiponahaze!’
Bakacela bukaufi ni linzila,Macelo abona akaba mwa linzila mokufitiwanga hahulu.*
10 Habana kushwa tala, kamba kushwa linyolwa,+Mi habana kubabulwa ki kucisa kokutuna kamba lizazi.+
Kakuli Yena yabashemuba uka baetelela,+Mi uka baisa kwa maweluwelu a mezi.+
11 Nikafetula malundu aka kaufela kuba linzila,Mi makululu aka akaumbuka.+
12 Hamubone! Ba, bazwa kwahule,+Mi hamubone! Ba, bazwa kwa mutulo ni kwa wiko,Mi ba, bazwa kwa naha ya Sinimi.”+
13 Hamuhuweleze ka tabo, mina mahalimu, mi wena lifasi hakunyakalale.+
Malundu awabelwe ka mihuwo ya tabo.+
Kakuli Jehova uomba-ombile batu bahae,+
Mi ushemuba batu bahae babanyandile.+
14 Kono Sione azwelapili kubulela, ali:
“Jehova uniyubekile,+ mi Jehova unilibezi.”+
15 Kana musali wakona kulibala mwanaa hae yaanya
Kamba kusashwela makeke mwana yazwile mwa mba yahae?Basali ba, niha bakalibala, na hanina kukulibala nikamuta.+
16 Bona! Nikuñozi mwa lizoho laka.
Mamota ahao a fapilaa ka kamita.
17 Bana bahao bakaakufa kukuta.
Baba kushandauzi ni kukusinya baka kusiya.
18 Inula meeto ahao, utalime kwa maneku kaufela.
Kaufelaa bona bakubukana hamoho.+
Bataha ku wena.
Jehova uli: “Ka na yapila,Uka baapala kaufela sina yaapala likabisa,Mi ukaitama bona sina mwaezezanga munyaliwa.
19 Nihaike kuli libaka zahao nelishandauzwi mi nelibile matota mi naha yahao neisinyizwe,+Cwale ikaba yenyinyani hahulu ku babapila mwateñi,+Mi bane bakumizize+ bakaba kwahule.+
20 Bana bane bapepilwe haneuli mwa sililo bakabulela inze uikutwela, bali:‘Sibaka se ki sesinyinyani ku na.
Unilukiseze sibaka kuli nipile honamo.’+
21 Mi ukabulela mwa pilu yahao, uli:‘Ki mañi yanipepezi bana ba,Kakuli ni musali yashwezwi ki bana mi ni mumba,Ni muhapiwa mi ni lipantiti?
Ki mañi yahulisize bana ba?+
Hamubone! Nenisiilwe ninosi,+Cwale bana ba, bazwa kai?’”+
22 Jehova Mulena Yapahami ka Kufitisisa, sabulela ki se, uli:
“Hamubone! Nikayemiseza macaba lizoho laka,Mi nikayemiseza batu sisupo* saka.+
Bakatisa bana bahao babashimani mwa mazoho abona*Ni kulwala bana bahao babasizana fa maheta abona.+
23 Malena baka kubabalela,+Mi bana babona babasizana ki bona babaka kuuta.
Baka kukubamela bawiselize lipata zabona fafasi+Mi bakalwaza liluli la kwa mahutu ahao,+Mi ukaziba kuli ki na Jehova;Baba nisepile habana kuswabiswa.”+
24 Kana muuna yamaata wakona kuamuhiwa batu bahapile kale,Kamba kana babahapilwe ki muhateleli bakona kuliululwa?
25 Kono Jehova sabulela ki se, uli:
“Nihaiba babahapilwe ki muuna yamaata bakaangiwa,+Mi babahapilwe ki muhateleli bakaliululwa.+
Nikalwanisa baba kulwanisa,+Mi nikapilisa bana bahao.
26 Nikatahisa kuli baba kunyandisa bace mibili yabona,Bakolwe mali abona, sina babakozwi waine yemunati.
Mi batu kaufela bakaziba kuli ki na Jehova,+Mupilisi wahao+ ni Muliululi wahao,+Yena Yamaata wa Jakobo.”+
Litaluso ze kwatasi
^ Linzwi ka linzwi, “nisali mwa mba.”
^ Kamba “Jehova uka nifa katulo yelukile.”
^ Kamba “mupuzo.”
^ Kamba mwendi, “fa malundunyana mokusina limela.”
^ Linzwi ka linzwi, “lifuba zabona.”
^ Kamba “musumo wa sisupo.”
