Liñolo la Jakobo 4:1-17
4 Lindwa ni likomano ze ku mina litiswa kiñi? Kana halitiswi ki litakazo zamina za nama zezwelapili kulwanisana mwa mibili yamina?+
2 Mwalakaza, kono hamufumani. Muzwelapili kubulaya batu ni kulakaza za babañwi, kono hamukoni kufumana. Muzwelapili kuba ni likomano ni kulwanisana.+ Hamuna, bakeñisa kuli hamukupi.
3 Hamukupa, hamufiwi, kakuli mulelo omukupela ufosahalile, kuli muitusise lika zeo kwa kukolwisa litakazo zamina za nama.
4 Mina babuki,* kana hamuzibi kuli kuba mulikanaa lifasi ki kuba sila ku Mulimu? Ka mukwa ocwalo, mutu kaufela yabata kuba mulikanaa lifasi uikeza sila sa Mulimu.+
5 Kamba kana munahana kuli liñolo libulela feela kusina libaka halili: “Moya oyahile ku luna uzwelapili kulakaza ka muna lika zeshutana-shutana”?+
6 Kono sishemo safa Mulimu ki sesituna. Kabakaleo, liñolo lili: “Mulimu uhanyeza babaikankabeka,+ kono ufa sishemo sahae ku babaikokobeza.”+
7 Ka mukwa ocwalo, muipeye kwatasaa Mulimu;+ kono muhanyeze Diabulosi,+ mi ukasaba ku mina.+
8 Musutelele ku Mulimu, mi ukasutelela ku mina.+ Mukenise mazoho amina, mina baezalibi,+ mi mutwekise lipilu zamina,+ mina babasa zibi hande zemuswanela kueza.
9 Munyande mi mulile ni kubokolola.+ Liseho lamina lifetuhe sililo, mi tabo yamina ifetuhe maswabi.
10 Muikokobeze mwa meeto a Jehova,*+ mi uka mipahamisa.+
11 Mutuhele kubulelana maswe, mizwale.+ Mutu kaufela yabulela maswe muzwale kamba yaatula muzwale wahae ulwanisa mulao mi uatula mulao. Cwale haiba uatula mulao, haumuezi wa mulao, kono u muatuli.
12 Kunani feela Mutomi wa Mulao alimuñwi ni Muatuli,+ yena yakona kupilisa ni kutimeza.+ Kono wena, ki wena mañi kuli uatule yeuyahile ni yena?+
13 Cwale hamuteeleze, mina babali: “Kacenu kamba kamuso lukaya mwa muleneñi wani ni kuyo tanda mwateñi silimo, mi lukayo eza pisinisi ni kufumana pulofiti,”+
14 hailifo hamuzibi mobuka bela bupilo bwamina kamuso.+ Kakuli mu mbundu yeina feela nakonyana ni kufela.+
15 Kono muswanela kubulela kuli: “Haiba Jehova* alata,+ lukapila mi lukaeza se kamba sani.”
16 Kono cwale mutabela kuitumbaeta ka kuikuhumusa. Kuitumbaeta kaufela kokucwalo kumaswe.
17 Ka mukwa ocwalo, haiba mutu aziba kueza sesilukile kono asa siezi, ueza sibi.+
Litaluso ze kwatasi
^ Kamba “Mina babasa sepahali.”
^ Mubone Litaba Zeekelizwe A5.
^ Mubone Litaba Zeekelizwe A5.
