Jeremia 4:1-31
4 “Haiba ukutela ku na, wena Isilaele,” kubulela Jehova,“Haiba ukutela ku naMi haiba milimu yahao ya maswaniso yenyenyisa uizwisa fapilaa ka,Fohe, hauna kuyambaela.+
2 Mi haiba ukonka, wali:‘Ka Jehova yapila!’ inze ili ka niti, ka katulo yelukile, ni ka kuluka,Fohe, macaba akaipumanela mbuyoti ka yena,*Mi akaitumba ka yena.”+
3 Kakuli Jehova sabulela kwa batu ba mwa Juda ni Jerusalema ki se, uli:
“Muitimele naha yenunile,+Mi musike mwazwelapili kucala mwa miutwa.
4 Mukene mwa mupato ka mukwa otabisa Jehova,Mi musehulule matalo a lipilu zamina,+Mina batu ba Juda ni babayahile mwa Jerusalema,Kuli buhali bwaka busike bwatuka sina muliloNi kulyanta kusina yabutima,Bakeñisa likezo zamina zemaswe.”+
5 Muzibahaze mwa Juda, mi mushaele mwa Jerusalema.
Musholoke ni kuliza lunaka mwa naha kamukana.+
Muhuweleze ka linzwi lelituna, muli: “Hamukopane hamoho,Mi lusabeleñi mwa mileneñi yesilelelizwe.+
6 Muyemise sisupo* sesibonisa nzila yeya kwa Sione.
Mubate makundamo, mi musike mwayema feela,”
Kakuli nitisa ziyezi yezwa kwa mutulo,+ ili sinyeho yetuna.
7 Sila sitile inge tau yezwa mwa mushitu otibani;+Musinyi wa macaba ufundukile.+
Ufundukile kuzwa mwa sibaka sahae kuli atahise kuli naha yahao isabiwe hahulu.
Mileneñi yahao ikaezwa matota, kusike kwaba ni yapila mwateñi.+
8 Kabakaleo, muapale masila a saka,+Mulile* ni kubokolola,Kakuli buhali bwa Jehova bobutuka habusika zwa ku luna.
9 “Ka lizazi leo, pilu* ya mulena ikafokola,+Ni yona pilu* ya manduna;Baprisita bakasaba maswe, mi bapolofita bakakomoka hahulu,” kubulela Jehova.+
10 Kiha senili: “Mawe, Jehova Mulena Yapahami ka Kufitisisa! Luli ukwashekile sicaba se,+ ni Jerusalema, hauize: ‘Mukaba ni kozo,’+ hailifo mukwale ufa mimizo yaluna.”
11 Ka nako yeo, kukabulelwa ka za sicaba se, ni Jerusalema kuli:
“Moya ocisa ozwa kwa malundu a mwa lihalaupa aasina sesiñwiUkafukela mwanaa musizana* wa sicaba saka;Hauteli kuto ulusa kamba kuto kenisa.
12 Moya omaata uzwa mwa libaka zeo ka taelo yaka.
Cwale nika baatula.
13 Hamubone! Ukataha sina malu a pula,Mi likoloi zahae liswana sina moya wa liñungwa.+
Lipizi zahae libubebe kufita limbande.+
Lunani bumai kakuli lusinyehile!
14 Utapise pilu yahao, uikenise kwa bumaswe, wena Jerusalema, kuli upiliswe.+
Ukaanga nako yekuma kai unzo hupula mihupulo yemaswe?
15 Kakuli kunani linzwi lelizibahaza taba mwa Dani,+Mi lishaela kozi kwa malundu a Efraimi.
16 Muzibahaze taba yeo, ki cwalo, muizibahaze kwa macaba;Mutaluseze Jerusalema sesi mutahela.”
“Babandameni* bataha, kuzwa kwa naha ya kwahule,Mi ka manzwi amatuna, bakazibahaza zekatahela mileneñi ya Juda.
17 Bataha kuto mulwanisa mwa maneku kaufela inge bakanteli ba simu,+Kakuli unifetuhezi,”+ kubulela Jehova.
18 “Linzila zahao ni likezo zahao lika kukutela.+
Kozi yahao ibaba hahulu,Kakuli iyo fita ni kwa pilu yahao!”
19 Mawe, butuku boniutwa,* butuku boniutwa!
Niutwa butuku bobutuna mwa pilu yaka.*
Pilu yaka inata maswe mwa sifuba saka.
Hanikoni kukuza,Kakuli niutwile mulumo wa lunaka,Mukosi wa ndwa.*+
20 Kubihiwa likozi ka kutatamana,Kakuli naha kamukana isinyehile.
Litende zaka lisinyehile ka sipundumukela,Masila a litende zaka asinyehile ka nako iliñwi.+
21 Nikaanga nako yekuma kai inze nibona sisupo,*Inze niutwa mulumo wa lunaka?+
22 “Kakuli batu baka ki likuba;+Haba niisi pilu.
Ki bana babali litoto, habana kutwisiso.
Babutali kwa kueza bumaswe,Kono habazibi kueza bunde.”
23 Neniboni naha, mi neili mukungulu ni matota.+
Natalima mahalimu, mi liseli laona nelisiyo.+
24 Nabona malundu, mi naazikinyeha,Mi malundunyana naanyanganya.+
25 Natalima mi nekusina mutu,Mi linyunywani za mahalimu nelibalehile kaufelaa zona.+
26 Nabona kuli simu ya likota za miselo ifetuhile lihalaupa,Mi mileneñi yayona kaufela iwisizwe.+
Nekuezahezi cwalo kabakala Jehova,Kabakala buhali bwahae bobutuka.
27 Kakuli Jehova sabulela ki se, uli: “Naha kamukana ikafetuha matota,+Kono hanina kuiyundiseleza.
28 Ka lona libaka leo, naha ikaba mwa maswabi,+Mi mahalimu akaunsufala.+
Kukaezahala cwalo kakuli nibulezi, niatuzi,Mi hanina kucinca muhupulo waka,* kamba kukwenuha.+
29 Hakuutwahala mulumo wa bapahami ba lipizi ni babakunupa ka buta,Batu kaufela mwa muleneñi babaleha.+
Bakena mwa mushitu otibani,Mi bapahama macwe.+
Mileneñi kaufela yayubekwa,Mi hakuna mutu yapila ku yona.”
30 Cwale hase ushandauzwi cwana, ukaezañi?
Neuapalanga liapalo za bufubelu bobutona,Neuikabisanga ka likabisa za gauda,Ni kuhulisa meeto ahao ka penti yensu.*
Kono kuikabisa kwahao hakutusi sesiñwi,+Kakuli baba kulakaza bakuhanile;Sebabata kukubulaya.+
31 Kakuli niutwile linzwi leliswana ni la musali yakula,Linyando leliswana ni la musali yapuluha mwanaa hae wapili,Linzwi la mwanaa musizana wa Sione yazwelapili kuyetela.
Ufumbutula mazoho ahae mi uli+
“Ninani bumai, kakuli nikatezi hahulu kabakala babulai!”
Litaluso ze kwatasi
^ Fo kikuli, ka Jehova.
^ Kamba “musumo wa sisupo.”
^ Kamba “Muinate fa lifuba.”
^ Kamba “bundume.”
^ Kamba “bundume.”
^ Wo ki mubulelelo wa kuloka obonisa inge kuli kubulelwa mutu, mwendi ili kubonisa makeke kamba kutwelo-butuku.
^ Linzwi ka linzwi, “Balibeleli,” fo kikuli, babalibelela muleneñi kuli bazibe nako ya kuulwanisa.
^ Linzwi ka linzwi, “mala aka.”
^ Linzwi ka linzwi, “mwa mamota a pilu yaka.”
^ Kamba mwendi, “mulumo wa muhuwo wa ndwa.”
^ Kamba “musumo wa sisupo.”
^ Kamba “kuinyaza.”
^ Kamba “penti ya meeto.”
