Jeremia 42:1-22
42 Cwale bazamaisi kaufela ba limpi, ni Johanani+ mwanaa Karea, Jezania mwanaa Hoshaya, ni batu kaufela, kukala ka yomunyinyani ka kufitisisa kuisa ku yomutuna ka kufitisisa, basutelela
2 mi bali ku mupolofita Jeremia: “Lwakupa shangwe, hakuutwe kupo yaluna ya kuli lushemubiwe, mi ululapelele ku Jehova Mulimu wahao, ulapelele bo masiyaleti ba kaufela, kakuli niha nebali babañata sebasiyezi babanyinyani,+ sina haubona.
3 Haike Jehova Mulimu wahao alubulelele nzila yeluswanela kuzamaya ku yona mi aluzibise seluswanela kueza.”
4 Mupolofita Jeremia abaalaba, ali: “Niutwile, mi nika milapelela ku Jehova Mulimu wamina kulikana ni kupo yamina; mi nika mibulelela linzwi kaufela laaka mialaba Jehova. Hanina kumipatela sesiñwi.”
5 Baalaba Jeremia, bali: “Haike Jehova abe paki ya niti ni yesepahala, alufe koto haiba lusaezi lika kaufela zaka lulaela Jehova Mulimu wahao, ka kuitusisa wena.
6 Ibe kuli ki zende ku luna kamba limaswe, lukamamela linzwi la Jehova Mulimu waluna, yelu kuluma ku yena, kuli lika liluzamaele hande bakeñisa kumamela linzwi la Jehova Mulimu waluna.”
7 Cwale hamulaho wa mazazi alishumi, linzwi la Jehova lataha ku Jeremia.
8 Jeremia kihaa lumela liñusa la kuyo biza Johanani mwanaa Karea ni bazamaisi kaufela ba limpi bane bali ni yena, ni batu kaufela, kukala ka yomunyinyani ka kufitisisa kuisa ku yomutuna ka kufitisisa.+
9 Ali ku bona: “Jehova Mulimu wa Isilaele, yena yene munilumile ku yena kuli nifitise ku yena kupo yamina ya kuli mushemubiwe, sabulela ki se, uli:
10 ‘Haiba luli muzwelapili kupila mwa naha ye, fo, nika miyaha mi hanina kumilutulula, nika micala mi hanina kumikumula, kakuli nika inyaza* kabakala kozi yeni mitahiselize.+
11 Musike mwasaba kabakala mulena wa Babilona, yemusaba.’+
“‘Musike mwasaba kabakala hae,’ kubulela Jehova, ‘kakuli niinzi ni mina, kuli nimipilise ni kumilamulela mwa lizoho lahae.
12 Mi nika mishwela makeke,+ kuli amishwele makeke ni kumikutiseza mwa naha yamina.
13 “‘Kono haiba mubulela kuli: “Batili, haluna kuzwelapili kupila mwa naha ye!” mi muhana kumamela linzwi la Jehova Mulimu wamina
14 ka kubulela kuli: “Batili, lukaya kwa naha ya Egepita,+ kolusike lwabona ndwa kamba kuutwa mulumo wa lunaka kamba kulapa kabakala kutokwa sico; ki kona kolukayo pila,”
15 fohe, muutwe linzwi la Jehova, mina bo masiyaleti ba Juda. Jehova wa limpi, yena Mulimu wa Isilaele, sabulela ki se, uli: “Haiba luli mutundamena kuya kwa Egepita mi muya kuyo pila kwateñi,*
16 fohe, ona mukwale omusaba ukayo mifumana kwa naha ya Egepita, mi lukupwe lomusaba luka milatelela kwa Egepita, mi mukayo shwela kwateñi.+
17 Mi batu kaufela babatundamena kuya kwa Egepita kuli bayo pila kwateñi bakayo bulaiwa ka mukwale, ka tala, ni ka butuku bobuyambukela. Hakuna ku bona yakapunyuha kamba kubanda kozi yenika batahiseza.”’
18 “Kakuli Jehova wa limpi, yena Mulimu wa Isilaele, sabulela ki se, uli: ‘Sina bunyemi bwaka ni buhali bwaka hane busululezwi batu ba Jerusalema,+ nika misululela cwalo buhali bwaka haiba muya kwa Egepita, mi mukaba nto yekutilwe, yesabisa hahulu, yeshubuzwi, ni yenyazahala,+ mi hamusa tola mubona sibaka se hape.’
19 “Jehova umibulelezi zeka mitahela, mina bo masiyaleti ba Juda. Musike mwaya kwa Egepita. Muzibe kuli kaniti nimilemusize kacenu
20 kuli mukashwa kabakala bufosi bwamina. Kakuli nemu nilumile ku Jehova Mulimu wamina, mwali: ‘Haku lulapelele ku Jehova Mulimu waluna, mi ulubulelele lika kaufela zakabulela Jehova Mulimu waluna, mi luka lieza.’+
21 Mi nimibulelezi kacenu, kono hamuna kumamela linzwi la Jehova Mulimu wamina kamba kueza nto ifi kamba ifi yaanilumile kuli nito mitaluseza yona.+
22 Kabakaleo, muzibe kuli kaniti mukabulaiwa ka mukwale, ka lukupwe, ni ka butuku bobuyambukela, kwa sibaka komubata kuya kuli muyo pila kwateñi.”+
