Taba Yende Yeneñozwi ki Joani 14:1-31
14 “Musike mwatuhelela lipilu zamina kuziyeleha.+ Mubonise tumelo ku Mulimu;+ mubonise tumelo ni ku na.
2 Mwa ndu ya Ndate kunani libaka za kuina zeñata.* Kambe hakucwalo nenika mibulelela, kakuli naya, niyo milukiseza sibaka.+
3 Hape, haiba niya kuyo milukiseza sibaka, nikakuta mi nika miamuhela haesu, kuli koniinzi ni mina mube kwateñi.+
4 Mi mwaziba nzila ya koniya.”
5 Tomasi+ ali ku yena: “Mulena, haluzibi kouya. Lukona kuziba cwañi nzila yeya kwateñi?”
6 Jesu ali ku yena: “Ki na nzila+ ni niti+ ni bupilo.+ Hakuna yataha ku Ndate haisi ka na.+
7 Kambe munizibile, kambe muzibile ni Ndate; kuzwa cwale mwamuziba mi mumuboni.”+
8 Filipi ali ku yena: “Mulena, lubonise Ndate, mi kukalikana ku luna.”
9 Jesu ali ku yena: “Niha seniinzi ni mina nako ye kaufela, kana hausika niziba Filipi? Mutu kaufela yaniboni uboni ni Ndate.+ Kutaha cwañi kuli ubulele kuli: ‘Lubonise Ndate’?
10 Kana hamukolwi kuli niswalisana ni Ndate mi Ndate uswalisana ni na?+ Litaba zeni mibulelela haniipuleleli zona na muñi,+ kono Ndate yaswalisana ni na nako kaufela ueza misebezi yahae.
11 Munikolwe kuli niswalisana ni Ndate mi Ndate uswalisana ni na; hakusi cwalo, mukolwe kabakala misebezi yaka kwateñi.+
12 Kaniti luli namibulelela nili, mutu kaufela yabonisa tumelo ku na ni yena ukaeza misebezi yenieza; mi ukaeza misebezi yemituna hahulu kufita ye,+ kakuli niya ku Ndate.+
13 Hape, semukupa kaufela ka libizo laka, nika sieza, kuli Ndate akanyiswe ka Mwana.+
14 Haiba mukupa nto ifi kamba ifi ka libizo laka, nika ieza.
15 “Haiba mwanilata, mukamamela milao yaka.+
16 Nikakupa Ndate mi uka mifa mutusi* yomuñwi kuli abe ni mina kuya kuile,+
17 ona moya wa niti,+ olisa koni kuamuhela lifasi, kakuli hali uboni kamba kuuziba.+ Mina mwauziba, kakuli uinzi ni mina nako kaufela mi ukumina.
18 Hanina kumisiya mwa maswabi.* Nikakutela ku mina.+
19 Kusiyezi nakonyana mi lifasi halina kunibona hape, kono mina muka nibona,+ kakuli napila mi ni mina mukapila.
20 Ka lizazi leo mukaziba kuli niswalisana ni Ndate, ni kuli muswalisana ni na, mi niswalisana ni mina.+
21 Mutu kaufela yanani milao yaka mi aimamela ki yena yanilata. Mi mutu kaufela yanilata ukalatwa ki Ndate, mi nika mulata, mi nikaiponahaza patalaza ku yena.”
22 Judasi,+ isiñi Isikariota, ali ku yena: “Mulena, kuezaheziñi kuli ulele kuiponahaza patalaza ku luna mi isiñi kwa lifasi?”
23 Jesu amualaba, ali: “Haiba mutu wanilata, ukamamela linzwi laka,+ mi Ndate uka mulata, mi lukataha ku yena ni kuto ina* ni yena.+
24 Mutu kaufela yasa nilati hamameli manzwi aka. Linzwi lemuutwa haki laka, kono ki la Ndate yanilumile.+
25 “Nimibulelezi lika ze hanisa inzi ni mina.
26 Kono mutusi, ona moya okenile, waka milumela Ndate ka libizo laka, ona uka miluta lika kaufela ni kumihupulisa lika kaufela zeni mibulelezi.+
27 Nimisiyela kozo; nimifa kozo yaka.+ Hani mifi yona ka moli mifela yona lifasi. Musike mwatuhelela lipilu zamina kuziyeleha kamba kulituhelela kukenelwa ki sabo.
28 Muutwile kuli nimibulelezi kuli: ‘Naya, mi nikakutela ku mina.’ Kambe mwanilata, nemuka taba kuli niya ku Ndate, kakuli Ndate ki yomuhulu ku na.+
29 Cwale nimibulelezi lika zeo lisika ezahala kale, kuli hase liezahezi, mulumele.+
30 Hanisa bulela zeñata ku mina kuzwa cwale, kakuli mubusi wa lifasi+ wataha, mi haakoni kuniswala.*+
31 Kono kuli lifasi lizibe kuli nilata Ndate, nieza sina mwanilaelezi Ndate.+ Hamuyeme, luzweñi mo.
Litaluso ze kwatasi
^ Kamba “mandu amañata.”
^ Kamba “muomba-ombi.”
^ Kamba “sina lindiala.”
^ Kamba “kuto ba mwa ndu.”
^ Kamba “haana maata fahalimwaa ka.”
