Lisamu 27:1-14
Samu ya Davida.
27 Jehova ki liseli laka+ mi ki yena yanipilisa.
Ki mañi yenika saba?+
Jehova ki yena yasileleza bupilo bwaka.+
Ki mañi yenika ikalelwa?
2 Batu babanani lunya hane banilwanisa kuli bace nama ya mubili waka,+Baba nitoile ni lila zaka ki bona bane basitatalile ni kuwa.
3 Mpi niha ikato toma mafulo ayona kuli inilwanise,Pilu yaka haina kusaba.+
Niha kukazuha ndwa ya kunilwanisa,Ni fo, nikazwelapili kuba ni sepo.
4 Nikupile nto iliñwi ku Jehova—Yona yenika zwelapili kulakaza—Kuli nipile mwa ndu ya Jehova ka mazazi kaufela a bupilo bwaka,+Kuli nibuhe bunde bwa JehovaMi nitalime tempele* yahae ka buitebuho.*+
5 Kakuli uka nipata mwa makundamo ahae mwa lizazi la ziyezi;+Uka nipata mwa sibaka sa kwa mukunda mwa tende yahae;+Uka nibeya fokulumbile fa licwe.+
6 Cwale toho yaka iumbukile mwahalaa lila zaka zeenipotolohile;Nikafa matabelo mwa tende yahae inze nihuweleza ka tabo;Nikaopelela Jehova milumbeko.
7 Uniutwe, wena Jehova, hanihuweleza ku wena;+Unishemube mi unialabe.+
8 Pilu yaka ibulezi kuli wena uize:
“Ubate pata yaka.”
Nikabata pata yahao, wena Jehova.+
9 Usike wanipatela pata yahao.+
Usike waleleka mutangaa hao ka buhali bwahao.
Ki wena yanitusa;+Usike wanifulalela kamba kunisiya, wena Mulimu yanipilisa.
10 Ndate ni me niha baka nifulalela,+Jehova yena uka nibabalela.+
11 Unilute kuzamaya mwa nzila yahao, wena Jehova,+Unietelele mwa nzila ya niti bakeñisa lila zaka.
12 Usike wanifa mwa mazoho a lila zaka,+Kakuli lipaki za buhata liyemi kunilwanisa,+
Mi lifumba kuniholofaza.
13 Nenikaba kai kambe nenisina tumeloKuli nikone kubona bunde bwa Jehova mwa naha ya babapila?*+
14 Usepe Jehova;+Ube ni bundume mi utiye pilu.+
Ki cwalo, usepe Jehova.
Litaluso ze kwatasi
^ Kamba “sibaka sesikenile.”
^ Kamba “ka kunahanisisa.”
^ Kamba mwendi, “Kaniti ninani tumelo ya kuli nikabona bunde bwa Jehova mwa naha ya babapila.”
