Lisamu 31:1-24
Ku muzamaisi wa lipina. Samu ya Davida.
31 Wena Jehova, nisabezi ku wena.+
Usike walumeleza kuli niswabe.+
Unilamulele kabakala kuluka kwahao.+
2 Usikekele zebe yahao* ku na.
Unilamulele kapili.+
Ube lilundu la silelezo ku na,Ube sibaka sesisilelelizwe sesi nipilisa.+
3 Kakuli ki wena licwe laka ni silelezo yaka;+Kabakala libizo lahao,+ uka nizamaisa ni kunietelela.+
4 Uka nikayutula mwa kanyandi keba niteezi nisazibi,+Kakuli ki wena musilelezi waka.+
5 Nibeya moya waka mwa lizoho lahao.+
Uniliuluzi, wena Jehova, Mulimu yanani niti.*+
6 Nitoile babasebeleza milimu ya maswaniso yesina tuso, yesatusi sesiñwi,Haili na, nisepile Jehova.
7 Nikatabiswa hahulu ki lilato lahao lelisa feli,Kakuli uboni manyando aka;+Waziba ziyezi-tuna yenili ku yona.
8 Hausika nifa mwa mazoho a sila,Kono uniyemisize mwa sibaka mokusina kozi.*
9 Unishemube, wena Jehova, kakuli niziyelehile.
Manyando afokolisize meeto aka,+ ni mubili waka kaufela.+
10 Bupilo bwaka buciwa ki maswabi+Mi lilimo zaka liciwa ki sitongo.+
Maata aka asweli afokola kabakala bufosi bwaka;Masapo aka asweli afokola.+
11 Nisheununwa ki lila zaka kaufela,+Sihulu beniyahile ni bona.
Mi nisabiwa ki benizibana ni bona;Haba nibona mwa nyangela, banimata.+
12 Hanisa liyo mwa lipilu* zabona mi nilibezwi, inge yashwile;Niswana inge nkwana yetubehile.
13 Niutwile mabulatwi amaswe amañata;Nipotolohilwe ki zesabisa.+
Habakopana hamoho sina mutu alimuñwi kunilwanisa,Balela kuniomba moyo.+
14 Kono nisepile wena, Jehova.+
Nili: “Ki wena Mulimu waka.”+
15 Mazazi* aka a mwa lizoho lahao.
Unilamulele kwa lila zaka ni ku baba ninyandisa.+
16 Ubenyiseze mutangaa hao pata yahao.+
Unilamulele ka lilato lahao lelisa feli.
17 Wena Jehova, usike walumeleza kuli niswabe hanihuweleza ku wena.+
Haike babamaswe baswabe;+Bakuziswe mwa Libita.*+
18 Milomo yebulela buhata ipalelwe kubulela,+Yona milomo yebulela za babalukile, ka buikuhumuso, ka buikankabeki, ni ka busheununi.
19 Bunde bwahao ki bobutuna hahulu!+
Ububulukezi baba kusaba,+Mi ububonisize babasabela ku wena, fapilaa batu kaufela.+
20 Uka bapata mwa sibaka sesiipatile, fapilaa hao+Kwahule ni milelo ya batu;Uka bapata mwa makundamo ahaoKuli ubasileleze kwa litasezo zemaswe.*+
21 Haike Jehova alumbekwe,Kakuli ka nzila yekomokisa, unibonisize lilato lahae lelisa feli,+ mwa muleneñi oambekilwe.+
22 Haili na, neniikalezwi mi senili:
“Nikayunda fapilaa hao.”+
Kono uutwile likupo zaka za kuikupela tuso hane nihuweleza ku wena.+
23 Mulate Jehova, mina kaufela babasepahala ku yena!+
Jehova usileleza babasepahala,+Kono ufa koto yetuna ku mutu kaufela yaikuhumusa.+
24 Mube ni bundume, mi mutiye lipilu,+
Mina kaufela babalibelezi Jehova.+
Litaluso ze kwatasi
^ Kamba “Inama uteeleze.”
^ Kamba “Mulimu yasepahala.”
^ Kamba “sibaka sesituna.”
^ Kamba “minahano.”
^ Linzwi ka linzwi, “Linako.”
^ Kamba “Sheoli,” fo kikuli, sibaka sa swanisezo sa babashwile. Mubone Litaluso za Manzwi.
^ Linzwi ka linzwi, “kwa malimi aomana.”
