Lisamu 72:1-20
Samu yebulela za Salumoni.
72 Wena Mulimu, ulute mulena likatulo za hao,Uzibise mwanaa mulena kuluka kwahao.+
2 Ayemele sicaba sahao ka kuluka,Mi ayemele batu bahao ba mayemo a kwatasi ka katulo yelukile.+
3 Haike malundu atiseze batu kozo,Mi malundunyana atise kuluka.
4 Mulena ayemele* ba mayemo a kwatasi mwa sicaba,Apilise bana ba babotana,Mi ayundise muputeleli.+
5 Baka kusaba ka nako kaufela ya kubateñi kwa lizaziNi nako kaufela ya kubateñi kwa kweli,Kuzwa lusika loluñwi kuya ku loluñwi.+
6 Mulena ukaswana sina pula yenela fa bucwañi bobupumilwe,Sina lufafazani lolukolobisa mubu.+
7 Mwa mazazi ahae, yalukile ukakonda,*+Mi kozo ikaekezeha+ kufitela kweli iba siyo.
8 Ukaba ni babusiwa* kukalela kwa liwate leliñwi kuisa ku leliñwiNi kuzwa kwa Nuka* kuisa kwa mafelelezo a lifasi.+
9 Babapila mwa lihalaupa baka mukubamela,Mi lila zahae likayunda.+
10 Malena ba kwa Tareshishi ni ba kwa lioli baka mutiseza ñamba.+
Malena ba kwa Sheba ni ba kwa Seba baka muzwiseza limpo.+
11 Malena kaufela baka mukubamela,Mi macaba kaufela aka musebeleza.
12 Kakuli ukalamulela mubotana yalilela kutusiwa,Ni mutu wa mayemo a kwatasi ni mutu kaufela yasina yamutusa.
13 Ukashwela makeke mutu wa mayemo a kwatasi ni mubotana,Mi ukapilisa bupilo* bwa babotana.
14 Uka balamulela kwa buhateleli ni kwa mifilifili,Mi mali abona akaba a butokwa mwa meeto ahae.
15 Haike apile nako yetelele mi afiwe gauda ya kwa Sheba.+
Alapelelwe ka nako kaufela,Mi afuyolwe lizazi kaufela.
16 Kukaba ni bubeke bobuñata mwa lifasi;+Bukaba bobuñata hahulu fahalimwaa malundu.
Miselo yahae ikaba yemiñata hahulu inge mwa Lebanoni,+Mi batu mwa mileneñi bakaata sina limela za lifasi.+
17 Haike libizo lahae liine kuya kuile,+Mi litume ka nako kaufela ya kubateñi kwa lizazi.
Haike batu baipumanele mbuyoti ka yena;+Macaba kaufela amubulele kuli utabile.
18 Haike Jehova Mulimu alumbekwe, yena Mulimu wa Isilaele,+Yena anosi yaeza lika zekomokisa.+
19 Libizo lahae lelinde lilumbekwe kuya kuile,+Mi kanya yahae itale mwa lifasi kaufela.+
Ameni, Ameni.
20 Fa ki fona folifelela litapelo za Davida, mwanaa Jese.+
Litaluso ze kwatasi
^ Linzwi ka linzwi, “aatule.”
^ Linzwi ka linzwi, “ukashoshela.”
^ Kamba “Ukabusa.”
^ Fo kikuli, Nuka ya Eufrati.
^ Kamba “moyo.”
