Lisamu 79:1-13
Samu ya Asafi.+
79 Wena Mulimu, macaba ataselize saanda sahao;+Basilafalize tempele yahao yekenile;+Bafetuzi Jerusalema kuba libunda la matakala.+
2 Bafile linyunywani za mahalimu litupu za batanga bahao kuli ibe lico zazonaMi bafile libatana za lifasi nama ya mibili ya babasepahala bahao.+
3 Basuluzi mali abona inge mezi mwa Jerusalema kamukana,Mi hakuna yasiyezi yaka bapumbeka.+
4 Lushubulwa ki babayahile ni luna;+Baba lupotolohile balusheununa ni kulunyefula.
5 Wena Jehova, ukaanga nako yekuma kai unzo halifile? Kuya kuile nji?+
Buhali bwahao bukatuka inge mulilo kuisa lili?+
6 Usululele buhali bwahao fahalimwaa macaba aasa kuzibiNi fahalimwaa mibuso yesabizi fa libizo lahao.+
7 Kakuli basinyize Jakobo kufelelezaMi bafetuzi naha yahae matota.+
8 Usike walufa mulatu kabakala bufosi bwa bo kuku waluna.+
Ulushwele makeke kapili,+Kakuli luisizwe hahulu kwatasi.
9 Ulutuse, wena Mulimu yalupilisa,+Kabakala libizo lahao lelikutekeha;
Ululamulele ni kuluswalela* libi zaluna kabakala libizo lahao.+
10 Kuli macaba asike ali: “Mulimu wabona ukai?”+
Haike kuzibahale mwahalaa macaba, inze luiponela,Kuli babasuluzi mali a batanga bahao bakutiselizwe.+
11 Haike uutwe sitongo sa lipantiti.+
Uitusise maata* ahao amatuna kuli upilise* babaatulezwi lifu.*+
12 Ukutiseze ha 7 babayahile ni luna+Kabakala linyefulo zeba kunyefuzi ka zona, wena Jehova.+
13 Mi cwale luna sicaba sahao, luna mutapi wa mwa mafulisezo ahao,+Lukaitumela ku wena kuya kuile;Mi lukazibahaza milumbeko yahao kuzwa lusika loluñwi kuya ku loluñwi.+
Litaluso ze kwatasi
^ Linzwi ka linzwi, “kukwahela.”
^ Linzwi ka linzwi, “lizoho.”
^ Kamba mwendi, “ulukulule.”
^ Linzwi ka linzwi, “bana ba lifu.”
