Livitike 12:1-8
12 Jehova aekeza kubulela ku Mushe, ali:
2 “Bulelela Maisilaele, uli: ‘Haiba musali aitwala* mi apepa mwana wamushimani, musali yo ukaba yasika kena ka mazazi a 7, sina mwabelanga yasika kena mwa mazazi aile kwa kweli.+
3 Ka lizazi labu 8, litalo la kwa buuna bwa mushimani likasehululwa.+
4 Musali yo ukazwelapili kuikenisa kwa mali ka mazazi amañwi a 33. Haswaneli kuswala nto ifi kamba ifi yekenile, mi haswaneli kukena mwa sibaka sesikenile kufitela mazazi a kuikenisa kwahae akwana.
5 “‘Haiba apepa mwana wamusizana, fohe, musali yo ukaba yasika kena ka mazazi a 14, sina mwabelanga ka nako yaile kwa kweli. Ukazwelapili kuikenisa kwa mali ka mazazi amañwi a 66.
6 Mazazi a kuikenisa kwahae kabakala kupepa mwana wamushimani kamba wamusizana hasaakwanile, ukaanga ngunyana yamuuna ya nubu ya kucisa, mwa silimo sayona sapili,+ ni nkwilimba yamwana ya nubu ya sibi kamba liiba la nubu ya sibi, alitise kwa munyako wa tende ya makopanelo, ku muprisita.
7 Muprisita ukafa zeo ku Jehova mi ukaeza sebelezo ya kukwahela libi za musali yo, mi musali yo ukakeniswa kwa mali ahae anaazwa. Wo ki ona mulao oama musali yapepa mwana wamushimani kamba wamusizana.
8 Kono haiba apalelwa kuzwisa ngu, fohe uswanela kuzwisa maiba amabeli kamba tunkwilimba twabana totubeli,+ yeñwi ki ya nubu ya kucisa mi yeñwi ki ya nubu ya sibi, mi muprisita uka muezeza sebelezo ya kukwahela libi zahae, mi ukaba yakenile.’”
Litaluso ze kwatasi
^ Kamba “aitwala peu.”
