Livitike 3:1-17
3 “‘Haiba nubu yahae ki sitabelo sa kuikabela*+ mi izwa mwa mutapi wa likomu, ibe kuli ki poho kamba sitole, uswanela kutisa komu yeiketile fapilaa Jehova.
2 Abeye lizoho lahae fahalimwaa toho ya nubu yahae, mi ibulaelwe kwa munyako wa tende ya makopanelo; mi bana ba Aruni, bona baprisita, bakasasa mali kwa maneku kaufela a aletare.
3 Aange kalulo yeñwi ya sitabelo sa kuikabela ni kuifa sina nubu yecisezwa Jehova ka mulilo:+ ili mafula+ akwahezi mala, mafula kaufela aapesize mala,
4 ni lipio zepeli hamoho ni mafula azona ali bukaufi ni noka. Hape azwise mafula a kwa sibiti hamoho ni lipio.+
5 Bana ba Aruni bakatushanisa zeo kaufela fa aletare, fahalimwaa nubu ya kucisa yebeilwe fa likota ze fa mulilo;+ ki nubu yeciswa ka mulilo ya munko omunati* ku Jehova.+
6 “‘Haiba nubu yahae izwa mwa mutapi wa lingu mi ubata kuezeza Jehova sitabelo sa kuikabela, atise ngu yeiketile yamuuna kamba yamusali.+
7 Haiba atisa ngunyana yamuuna sina nubu, fohe aitise fapilaa Jehova.
8 Uswanela kubeya lizoho lahae fahalimwaa toho ya nubu yahae, mi ibulaelwe fapilaa tende ya makopanelo. Bana ba Aruni bakasasa mali ayona kwa maneku kaufela a aletare.
9 Aange mafula kwa sitabelo sa kuikabela ni kuafa sina nubu yecisezwa Jehova ka mulilo.+ Apume muhata wa mafula kaufelaa ona bukaufi ni luteya, azwise mafula akwahezi mala, mafula kaufela aapesize mala,
10 ni lipio zepeli hamoho ni mafula azona ali bukaufi ni noka. Hape azwise mafula a kwa sibiti hamoho ni lipio.+
11 Mi muprisita ukatushanisa zeo kaufela fa aletare sina lico,* ili nubu yecisezwa Jehova ka mulilo.+
12 “‘Haiba nubu yahae ki puli, fohe aitise fapilaa Jehova.
13 Abeye lizoho lahae fahalimwaa toho yayona, mi ibulaelwe fapilaa tende ya makopanelo, mi bana ba Aruni baswanela kusasa mali ayona kwa maneku kaufela a aletare.
14 Kalulo yakatisa sina nubu yahae yecisezwa Jehova ka mulilo ki mafula akwahezi mala, mafula kaufela aapesize mala,+
15 ni lipio zepeli hamoho ni mafula azona ali bukaufi ni noka. Hape azwise mafula a kwa sibiti hamoho ni lipio.
16 Muprisita ukatushanisa zeo kaufela fa aletare sina lico,* ili nubu yeciswa ka mulilo ya munko omunati.* Mafula kaufela ki a Jehova.+
17 “‘Wo ki mulao wa kamita kwa masika amina kaufela, kai ni kai komupila: Musike mwaca mafula afi kamba afi kamba mali afi kamba afi.’”+
Litaluso ze kwatasi
^ Kamba “sitabelo sa linubu za kozo.”
^ Kamba “otabisa; omunde.” Linzwi ka linzwi, “okatulusa.”
^ Linzwi ka linzwi, “sinkwa,” fo kikuli, sina kalulo ya Mulimu ya sitabelo sa kuikabela.
^ Linzwi ka linzwi, “sinkwa,” fo kikuli, sina kalulo ya Mulimu ya sitabelo sa kuikabela.
^ Kamba “otabisa; omunde.” Linzwi ka linzwi, “okatulusa.”
