Taba Yende Yeneñozwi ki Luka 1:1-80

MUBAPALE

Kuñolela Teofile (1-4)
Kupepwa kwa Joani Mukolobezi kupolofitwa ki Gabriele (5-25)
Kupepwa kwa Jesu kupolofitwa ki Gabriele (26-38)
Maria upotela Elizabeta (39-45)
Maria ulumbeka Jehova (46-56)
Joani wapepiwa ni kubeiwa libizo (57-66)
Bupolofita bwa Zakaria (67-80)

1 Haubona babañata balikile kukopanya ni kuñola litaba za niti, zelulumela ka kutala* ni luna,+ ² sina feela mone lufezwi litaba zeo ki bane baiponezi zona kuzwa kwa makalelo+ ni kuba likombwa bazona,+ ³ ni na, kabakala kuli nibatisisize lika kaufela ka kunepahala kuzwa kwa makalelo, nihupuzi kukuñolela zona ka kulitatamanisa hande, wena Teofile yakutekeha hahulu,+ ⁴ kuli uzibe ka kutala buniti bwa litaba zeulutilwe ka mulomo.+ ⁵ Mwa mazazi a Heroda,*+ mulena wa Judea, nekunani muprisita yabizwa Zakaria wa mwa sitopa sa Abija.+ Musalaa hae naasimuluha kwa bana ba Aruni babasizana, mi libizo lahae neli Elizabeta. ⁶ Bubeli bwabona neli batu babalukile fapilaa Mulimu, nebalatelela milao ni litaelo kaufela za Jehova* basanyazahali. ⁷ Kono nebasina mwana, kakuli Elizabeta neli mumba, mi bubeli bwabona nese basupezi. ⁸ Cwale Zakaria hanaasebeza sina muprisita mwa sitopa sahae+ fapilaa Mulimu, ⁹ kulikana ni mukwa wa* buprisita, nako yahae ya kuli acise insense+ yafita hakena mwa sibaka sesikenile sa Jehova.*+ ¹⁰ Mi buñata bwa batu kaufela nebalapela fande ka nako yekuciswa insense. ¹¹ Lingeloi la Jehova* labonahala ku yena, inze liyemi kwa bulyo bwa aletare ya insense. ¹² Kono Zakaria halibona, aziyeleha, mi akenelwa ki sabo. ¹³ Niteñi lingeloi lali ku yena: “Usike wasaba Zakaria, kakuli kupo yahao iutwilwe, mi musalaa hao Elizabeta uka kupepela mwana wamushimani, mi umubeye libizo la Joani.+ ¹⁴ Ukataba ni kunyakalala hahulu, mi babañata bakataba kabakala kupepwa kwahae,+ ¹⁵ kakuli mwana yo ukaba yomutuna mwa meeto a Jehova.*+ Kono haswaneli nihanyinyani kunwa waine kamba sino sifi kamba sifi sesikola,+ mi ukatala moya okenile mane asika pepwa kale,*+ ¹⁶ mi ukakutisa bana ba Isilaele babañata ku Jehova* Mulimu wabona.+ ¹⁷ Hape, ukaitangeta ku yena ka moya ni ka maata a Elia,+ akutise lipilu za bo ndate-bana kwa bana babona+ ni kukutisa babasa utwi kwa butali bwa babalukile, kuli alukiseze Jehova* batu babaitukiselize.”+ ¹⁸ Zakaria abulelela lingeloi, ali: “Nikakolwa cwañi taba ye? Kakuli nisupezi, mi musalaa ka uhulile.” ¹⁹ Lingeloi lamualaba, lali: “Ki na Gabriele,+ yayemanga bukaufi fapilaa Mulimu,+ mi nilumilwe kuto bulela ni wena ni kushaela ku wena taba yende ye. ²⁰ Kono hakubone! Ukaba simumu mi ukapalelwa kubulela kufitela lizazi folika ezahalela lika ze, kakuli neusika lumela manzwi aka, aakatalelezwa ka nako yaona yetomilwe.” ²¹ Ka nako yeo, batu bazwelapili kulibelela Zakaria, mi bakomoka kuli naangile nako yetelele hahulu mwa sibaka sesikenile. ²² Hazwa mwateñi, naasakoni kubulela ku bona, mi balemuha kuli uboni makazo* mwa sibaka sesikenile. Azwelapili kubulela ku bona ka liponiso kono asiyala ali simumu. ²³ Mazazi a sebelezo yahae yekenile* hafelile, aya kwa ndu yahae. ²⁴ Hamulaho wa mazazi asikai, Elizabeta musalaa hae aitwala, mi aina anosi kokusina batu ka likweli zeketalizoho, inze ali: ²⁵ “Ki mona mwaniezelize Jehova* cwalo mwa mazazi a. Unihupuzi kuli anizwise lishubu kwa batu.”+ ²⁶ Mwa kweli yahae yabu 6, lingeloi Gabriele+ lalumiwa ki Mulimu kuya kwa muleneñi wa mwa Galilea obizwa Nazareta, ²⁷ ku mwalyanjo+ yanaasepisizwe kunyalwa* ki muuna yabizwa Josefa wa mwa ndu ya Davida, mi libizo la mwalyanjo yo neli Maria.+ ²⁸ Mi halifita, lingeloi lali ku yena: “Lumela, wena yashemubilwe hahulu, Jehova* uinzi ni wena.” ²⁹ Kono aziyeleha hahulu hautwa manzwi ahae, mi alika kunahanisisa zene italusa tumeliso yecwalo. ³⁰ Lingeloi kiha lili ku yena: “Usike wasaba, Maria, kakuli Mulimu ukushemubile. ³¹ Mi hakubone! Ukaitwala* mi ukapepa mwana wamushimani,+ mi umubeye libizo la Jesu.+ ³² Yena ukaba yomutuna+ mi ukabizwa Mwana wa Yapahami ka Kufitisisa,+ mi Jehova* Mulimu uka mufa lubona lwa Davida ndatahe,+ ³³ mi ukabusa sina Mulena fahalimwaa ba ndu ya Jakobo kuya kuile, mi Mubuso wahae hauna kufela.”+ ³⁴ Kono Maria abulelela lingeloi, ali: “Taba yeo ikaezahala cwañi, kakuli hanisika lobala kale ni muuna?”+ ³⁵ Lingeloi lamualaba, lali: “Moya okenile ukataha ku wena,+ mi maata a Yapahami ka Kufitisisa akaba fahalimwaa hao. Mi ka lona libaka leo, yakapepwa ukabizwa yakenile,+ Mwanaa Mulimu.+ ³⁶ Mi hakubone! Elizabeta mwanahabo wena, yene bali ki mumba, ni yena uitwezi mwana wamushimani mwa busupali bwahae, mi ye ki yona kweli yahae yabu 6; ³⁷ kakuli ku Mulimu hakuna linzwi* lelika pala kutalelezwa.”+ ³⁸ Cwale Maria ali: “Hakubone! Na ni mutangaa Jehova!* Hakuezahale ku na kulikana ni linzwi lahao.” Mi lingeloi lamusiya. ³⁹ Cwale mwa mazazi ao, Maria afunduka mi aakufela kwa naha ya malundu, ku omuñwi wa mileneñi ya Juda, ⁴⁰ mi akena mwa ndu ya Zakaria ni kulumelisa Elizabeta. ⁴¹ Elizabeta hautwa tumeliso ya Maria, mbututu ye mwa mba yahae yanyanganya, mi Elizabeta atala moya okenile ⁴² mi ahuwa ka linzwi lelituna, ali: “Ufuyauzwi mwahalaa basali, ni mwana ya mwa mba yahao ufuyauzwi! ⁴³ Cwale kutaha cwañi kuli nibe ni tohonolo ye, ya kupotelwa ki mahe Mulenaaka? ⁴⁴ Kakuli hakubone! Linzwi la tumeliso yahao lisafita feela mwa mazebe aka, mbututu ye mwa mba yaka yanyanganya ka tabo. ⁴⁵ Ni yena musali yalumezi unani tabo, kakuli lika zeo zabulelezwi, zezwa ku Jehova,* likatalelezwa ka kutala.” ⁴⁶ Mi Maria ali: “Moyo* waka ububeka Jehova,*+ ⁴⁷ mi moya waka haukoni kupalelwa kunyakalala kabakala Mulimu, yena Mupilisi waka,+ ⁴⁸ kabakala kuli uboni mayemo a kwatasi a mutangaa hae.+ Kakuli hakubone! Kuzwa cwale, masika kaufela akabulela kuli niyatabile,+ ⁴⁹ kakuli Yamaata uniezelize zetuna, mi libizo lahae likenile,+ ⁵⁰ mi mwa masika ni masika, sishemo sahae siinzi ku baba musaba.+ ⁵¹ Uezize zemaata ka lizoho lahae; uhasanyize babanani milelo ya kuikankabeka mwa lipilu zabona.+ ⁵² Utuluzi baana babamaata fa mabona abona+ mi upahamisize baba kwatasi;+ ⁵³ ukulisize babashwile tala ka lika zende,+ mi bane banani sifumu ubakutisize mazoho-zoho. ⁵⁴ Utusize Isilaele mutangaa hae, uhupuzi sishemo sahae,+ ⁵⁵ sina mwanaabulelezi ku bo kuku waluna, ku Abrahama ni kwa bana* bahae,+ kuya kuile.” ⁵⁶ Maria kihaa ina ni yena ibato ba likweli zetaalu mi akutela kwa ndu yahae. ⁵⁷ Cwale nako yafita ya kuli Elizabeta apuluhe, mi apuluha mwana wamushimani. ⁵⁸ Mi bane bapila bukaufi ni Elizabeta ni bahabo yena bautwa kuli Jehova* umushemubile hahulu, mi bakala kutaba ni yena.+ ⁵⁹ Fa lizazi labu 8, bataha kuto kenya mwanana mwa mupato,+ mi nebabata kumubeya libizo la ndatahe, Zakaria. ⁶⁰ Kono mahe aalaba, ali: “Batili! Ukabizwa Joani.” ⁶¹ Kiha bali ku yena: “Hakuna yabizwa ka libizo leo ku bahabo wena.” ⁶² Cwale babuza ndatahe ka lisupo kuli ataluse libizo lanaabata kuli abizwe ka lona. ⁶³ Mi akupa litapa ni kuñola fateñi kuli: “Libizo lahae ki Joani.”+ Kiha bamakala kaufelaa bona. ⁶⁴ Honafo, mulomo wahae wakwaluha mi lilimi lahae latamuluha, mi akala kubulela,+ alumba Mulimu. ⁶⁵ Mi batu kaufela mwa silalanda seo bakenelwa ki sabo, mi litaba zeo kaufela zakala kubulelwa mwa naha ya malundu ya Judea kaufela. ⁶⁶ Mi kaufela bane bautwile babuluka litaba zeo mwa lipilu zabona, bali: “Cwale mwanana yo ukaba mañi?” Kakuli lizoho la Jehova* luli nelili ni yena. ⁶⁷ Cwale Zakaria ndatahe mwana, naatezi moya okenile, mi apolofita, ali: ⁶⁸ “Kulumbekwe Jehova* Mulimu wa Isilaele,+ kakuli uhupuzi batu bahae ni kubapilisa.+ ⁶⁹ Mi ulutahiselize lunaka lwa kupiliswa*+ mwa ndu ya Davida mutangaa hae,+ ⁷⁰ sina mwanaabulelezi ka mulomo wa bapolofita bahae babakenile ba kwaikale,+ ⁷¹ ka za kulupilisa kwa lila zaluna ni ka za kulupilisa mwa mazoho a baba lutoile kaufela;+ ⁷² kuli ashemube bo kuku waluna ni kuhupula tumelelano yahae yekenile,+ ⁷³ bona buitamo bwanaakonkile ku Abrahama, kuku waluna,+ ⁷⁴ kuli hase lulamulezwi mwa mazoho a lila zaluna, alufe tohonolo ya kumufa sebelezo yekenile lusina sabo ⁷⁵ ka busepahali ni kuluka fapilaa hae mwa mazazi aluna kaufela. ⁷⁶ Kono haili wena mwana yomunyinyani, ukabizwa mupolofita wa Yapahami ka Kufitisisa, kakuli ki wena yakaitangeta fapilaa Jehova* kuli ulukise linzila zahae,+ ⁷⁷ ufe batu bahae zibo ya kupiliswa ka swalelo ya libi zabona,+ ⁷⁸ kabakala mukekecima wa Mulimu waluna. Ka ona mukekecima wo, lukapotelwa ki liseli la lizazi lelipazula kuzwa kwahalimu, ⁷⁹ kuli libonise babainzi mwa lififi ni mwa muluti wa lifu+ ni kuzamaisa mahutu aluna mwa nzila ya kozo.” ⁸⁰ Mi mwana yomunyinyani ahula ni kutiya mwa moya, mi azwelapili kuina mwa lihalaupa kufitela lizazi lanaaiponahalize ku Isilaele.