Taba Yende Yeneñozwi ki Luka 4:1-44
4 Cwale Jesu azwa kwa Jordani, atezi moya okenile, mi aiswa ki moya mwa lihalaupa+
2 ka mazazi a 40, inze alikwa ki Diabulosi.+ Mi naasika ca sesiñwi mwa mazazi ao, mi cwale mazazi ao hasaafelile, ashwa tala.
3 Diabulosi kihaa li ku yena: “Haiba u mwanaa Mulimu, bulelela licwe le, kuli lifetuhe sinkwa.”
4 Kono Jesu amualaba, ali: “Kuñozwi kuli: ‘Mutu halukeli kupila sinkwa feela.’”+
5 Cwale amuisa fokulumbile mi amubonisa mibuso kaufela ya lifasi ka nako iliñwi feela.+
6 Diabulosi kihaa li ku yena: “Nika kufa maata fahalimwaa mibuso ye kaufela ni kanya yayona, kakuli nifilwe maata ao,+ mi niafa ku yenitabela kufa kaufela.
7 Cwale, haiba unilapela feela hañwi, maata ao kaufela akaba ahao.”
8 Jesu amualaba, ali: “Kuñozwi kuli: ‘Ki Jehova* Mulimu wahao yeulukela kulapela, mi ki yena feela anosi yeulukela kufa sebelezo yekenile.’”+
9 Cwale amuisa mwa Jerusalema mi amuyemisa fa muongola wa* tempele mi ali ku yena: “Haiba u mwanaa Mulimu, utulele fafasi,+
10 kakuli kuñozwi kuli: ‘Ukalaela mangeloi ahae ka zahao, kuli akusileleze,’
11 ni kuli, ‘Aka kuakwela mwa mazoho aona, kuli lihutu lahao lisike lakubwa ki licwe.’”+
12 Jesu amualaba, ali: “Kuizwe: ‘Usike walika Jehova* Mulimu wahao.’”+
13 Cwale Diabulosi hasaafelize miliko yahae kaufela, amusiya kufitela nako yeñwi yeswanela.+
14 Cwale Jesu akutela mwa Galilea+ ka maata a moya. Mi lipiho zende ka za hae zahasanela mwa naha yeo kaufela.
15 Hape akala kuluta mwa masinagoge abona, mi naakutekiwa ki batu kaufela.
16 Cwale aya kwa Nazareta,+ kona kwanaahulezi, mi ka mukwa wahae ka lizazi la Sabata, akena mwa sinagoge+ mi ayema kuli abale.
17 Cwale afiwa muputo wa mupolofita Isaya, mi aapula muputo wo ni kufumana fone kuñozwi kuli:
18 “Moya wa Jehova* u fahalimwaa ka, kakuli yena unitozize kuli nishaele taba yende kwa babotana. Unilumile kukutaza babahapilwe kuli bakalukululwa ni kukutaza libofu kuli likabona, ni kulukulula babahatelezwi,+
19 ni kukutaza mwaha wa kushemubiwa ki Jehova.”*+
20 Cwale aputa muputo, aukutiseza ku sikombwa, ni kuina fafasi; mi meeto a batu kaufela mwa sinagoge naamutalimezi hahulu.
21 Mi cwale ali ku bona: “Kacenu, liñolo lemusazo ikutwela le, litalelelizwe.”+
22 Mi kaufelaa bona bakala kubulela zende ka za hae ni kumakala kabakala bunde bwa manzwi anaazwa mwa mulomo wahae,+ mi nebali: “Kana haki yena mwanaa Josefa yo?”+
23 Kihaa li ku bona: “Kaniti luli mukaitusisa pulelo ye, ku na: ‘Wena mualafi, hakuifolise. Ueze ni mona mo mwa sibaka sahenu lika zeluutwile kuli liezizwe mwa Kapernauma.’”+
24 Cwale ali ku bona: “Kaniti namibulelela nili, hakuna mupolofita yaamuhelwa hande mwa sibaka sahabo.+
25 Ka mutala, nimibulelela niti nili: Nekunani limbelwa zeñata mwa Isilaele mwa mazazi a Elia lihalimu hane likwalilwe ka lilimo zetaalu ni likweli ze 6, mi lukupwe lolutuna lwawela naha kaufela.+
26 Niteñi, Elia naasika lumiwa ku yomuñwi wa basali bao, haisi ku musali wa mbelwa yanaapila kwa Sarepta mwa naha ya Sidoni.+
27 Hape, nekunani ba mbingwa babañata mwa Isilaele mwa mazazi a mupolofita Elisha; kono ku bao kaufela hakuna nihaiba alimuñwi yanaakenisizwe,* kwandaa Naamani, wa Musiria.”+
28 Cwale batu kaufela bane bautwa litaba zeo mwa sinagoge bahalifa hahulu,+
29 mi bayema ni kumuisa kapili kwande a muleneñi, mi bamuisa fahalimwaa lilundu fone uyahezwi muleneñi wabona, kuli bamunepele fafasi.
30 Kono yena afita mwahalaa bona mi aikela.+
31 Kihaa shetumukela mwa Kapernauma, muleneñi wa mwa Galilea. Mi naaluta batu la Sabata,+
32 mi bakomoka hahulu mulutelo wahae,+ kakuli naabulela ka maata.
33 Cwale mwa sinagoge nekunani muuna yanaakenwi ki mudimona, mi ahuwa ka linzwi lelituna, ali+
34 “Mawe! Lunani taba mañi ni wena Jesu, wa Munazareta?+ Kana utezi kuto lubulaya? Nakuziba hande, ki wena Yakenile wa Mulimu.”+
35 Kono Jesu akalimela mudimona, ali: “Kuza, mi hakuzwe ku yena.” Cwale mudimona hase uwiselize muuna yo fafasi mwahalaa bona, wazwa ku yena kusina kumuholofaza.
36 Mi batu kaufela hababona cwalo bakomoka hahulu mi bakala kubulelisana, bali: “Ki mubulelelo mañi wo? Kakuli ulaela mioya yemasila ka maata, mi yazwa!”
37 Cwale litaba ka za hae zazwelapili kuyamba mwa maneku kaufela a naha yeo.
38 Hasaazwile mwa sinagoge, ayo kena mwa ndu ya Simoni. Cwale mukwenyanaa Simoni wamusali naaswelwi ki fibele yebuhali, mi bamukupa kuli amutuse.+
39 Cwale ainamela ku yena mi akalimela fibele, mi yafela. Honafo azuha mi akala kubasebeleza.
40 Kono lizazi hane lilikela, kaufela bane banani bakuli ba matuku a mifuta-futa babatisa ku yena. Abafolisa ka kubeya mazoho ahae fahalimwaa yomuñwi ni yomuñwi wabona.+
41 Madimona ni ona azwa ku babañata, anze ahuwa, ali: “Ki wena Mwanaa Mulimu.”+ Kono aakalimela, mi naasa alumelezi kubulela,+ kakuli naamuziba kuli ki yena Kreste.+
42 Kono lizazi hase lipazuzi, azwela kwande mi aya kwa sibaka kokusina batu.+ Kono buñata bwakala kumubata* mi bwataha kwanaainzi, mi bwalika kumuhanisa kuli asike abasiya.
43 Kono ali ku bona: “Nilukela kuyo shaela taba yende ya Mubuso wa Mulimu ni kwa mileneñi yemiñwi, kakuli ki sona senilumezwi.”+
44 Cwale aya inze akutaza mwa masinagoge a Judea.
Litaluso ze kwatasi
^ Mubone Litaba Zeekelizwe A5.
^ Kamba “limotanyana la fa situwa sa; fa sibaka sesilumbile hahulu sa.”
^ Mubone Litaba Zeekelizwe A5.
^ Mubone Litaba Zeekelizwe A5.
^ Mubone Litaba Zeekelizwe A5.
^ Kamba “yanaafolisizwe.”
^ Kamba “kumuzuma.”
