Kwa Maefese 4:1-32
4 Ka mukwa ocwalo, namikupa, na yali lipantiti+ kabakala Mulena, kuli muzamaye ka mukwa oswanela,+ kulikana ni pizo yene mubizizwe ka yona,
2 ka buikokobezo*+ ni bunolo, ka pilu-telele,+ inze muswalelana ka lilato,+
3 munze mulika ka taata kubuluka buñwi bwa moya ka kozo yetamahanya.+
4 Kunani mubili ulimuñwi,+ ni moya ulimuñwi,+ sina mone mubizelizwe kwa sepo iliñwi+ ya pizo yamina;
5 kunani Mulena alimuñwi,+ tumelo iliñwi, kolobezo iliñwi;
6 Mulimu alimuñwi ni Ndate wa batu kaufela, ya fahalimwaa bona kaufela ni yasebeza ka bona kaufela ni ya ku bona kaufela.
7 Cwale sishemo sa Mulimu nesifilwe ku yomuñwi ni yomuñwi waluna ka kuya ka mwanaalikanyelelize Kreste mpo yefiwa feela. +
8 Kakuli liñolo lili: “Hanaakambamezi kwa lihalimu naaisize bahapiwa; naafile limpo zeli batu.”+
9 Cwale pulelo ya kuli “hanaakambamezi” italusañi kwandaa kuli hape naashetumukezi mwa libaka za fafasi, fo kikuli, mwa lifasi?
10 Yena yanaashetumukile ki yena hape yanaakambami+ kufitelela mahalimu kaufela,+ kuli akone kutaleleza lika kaufela.
11 Mi naafile babañwi kuli babe baapositola,+ babañwi babe bapolofita,+ babañwi babe bakutazi,*+ babañwi babe balisana ni baluti,+
12 ka mulelo wa kusikulula* babakenile, kuli bapete musebezi wa bukombwa, kuli batiise mubili wa Kreste,+
13 kufitela kaufelaa luna luba mwa buñwi* bwa tumelo ni bwa zibo yenepahezi ya Mwanaa Mulimu, kuli lube muuna yahulile,*+ mane lufite fa tikanyo yekwanile ya siyemo sanaafitile ku sona Kreste.
14 Hakulicwalo halusa swanela kuba banana, babazukuzwa inge ka mandinda ni kukashezwa kwa ni kwani ki moya kaufela wa tuto+ ka bupumi bwa batu, ka milelo ya buhata.
15 Kono halunze lubulela niti, haike luhule ka lilato mwa lika kaufela ku yali toho, yena Kreste.+
16 Mubili kaufela+ ukopanyizwe hamoho ku yena mi uswalisanisizwe ka ngongo kaufela yefa tuso yetokwahala. Silama ni silama hasinze sisebeza ka mokuswanelehela, mubili wahula haunze uicaha mwa lilato.+
17 Cwale se ki sona senibulela ni kupaka ku Mulena, kuli muswanela kutuhela kuzamaya ka mwazamaela macaba amañwi,+ ka kutokwa tuso kwa minahano yaona.+
18 Minahano yabona i mwa lififi mi bakwahule ni bupilo bwa Mulimu, kabakala kutokwa zibo kwabona, kabakala kumbumbutela kwa lipilu zabona.
19 Habasa lemuha bumaswe nibobukana mi baituhelezi kuya ka muzamao wa kusaswabela bufosi*+ kuli baeze mufuta kaufela wa masila ka mukwañuli.
20 Kono nemusika ituta kuli Kreste ucwalo,
21 haiba luli nemu muutwile mi nemulutilwe ka yena, sina niti moiinezi ku Jesu.
22 Nemulutilwe kutubula butu bwakale,+ bobulumelelana ni muzamao wamina wakale ni bobusinyiwa ka kuya ka litakazo zabona zepuma.+
23 Mi muswanela kuzwelapili kuuncafazwa mwa moya osusumeza munahano wamina,*+
24 mi muswanela kuapala butu bobunca+ bone bubupilwe ka kulikana ni tato ya Mulimu mwa kuluka kwa niti ni busepahali.
25 Ka mukwa ocwalo, haubona cwale mutuhezi bupumi, mubulelelane niti yomuñwi ni yomuñwi,+ kakuli lu lilama za mubili ulimuñwi.+
26 Hamuhalifa, musike mwaeza sibi;+ musike mwalikelelwa ki lizazi inze muhalifile;+
27 musike mwafa Diabulosi kolo.*+
28 Yauzwa asike auzwa hape; kono asebeze ka taata, aeze musebezi omunde ka mazoho ahae,+ kuli abe ni sa kuikabela ni yatokwile.+
29 Kusike kwazwa linzwi lelibolile mwa mulomo wamina,+ kono kuzwe feela manzwi amande atiisa kulikana ni mokutokwahalela, ilikuli atuse baba autwa.+
30 Hape musike mwaswabisa moya okenile wa Mulimu,+ omuswailwe liswayo+ ka ona bakeñisa lizazi la kulukululwa ka tiululo.+
31 Muzwise ku mina mufuta kaufela wa zebaba,+ buhali, mabifi, kutatauka, ni lipulelo zemaswe,+ ni nto ifi kamba ifi yeholofaza.+
32 Kono mubonisane sishemo, mube ni mukekecima,+ inze muswalelana ka pilu kaufela sina Mulimu ni yena hamiswalezi ka pilu kaufela ka Kreste.+
Litaluso ze kwatasi
^ Kamba “kuba ni munahano o kwatasi.”
^ Kamba “bashaeli ba taba yende.”
^ Kamba “kuluta.”
^ Kamba “swalisano.”
^ Kamba “yakolile.”
^ Ka Sigerike ki a·selʹgei·a. Mubone Litaluso za Manzwi.
^ Kamba “mwa moya ozamaisa munahano wamina.” Linzwi ka linzwi, “mwa moya wa munahano wamina.”
^ Kamba “musike mwafa Diabulosi sibaka.”
