Kwa Magalata 6:1-18
6 Mizwale, mutu nihaka fosa asika ziba kale kuli ufosize, mina babakwanisize zetokwahala kwa moya mulike kumusikulula ka moya obunolo.+ Kono mutokomele,+ kakuli ni mina mukasuhana mwalikwa.+
2 Muzwelepili kulwalisana mishimbo,+ mi ka nzila yeo mutaleleze mulao wa Kreste.+
3 Kakuli haiba mutu anahana kuli ki wa butokwa kono yena haki sesiñwi,+ waipuma.
4 Kono mutu ni mutu atatube likezo zahae,+ mi cwale ukaba ni libaka la kunyakalala ka lona anosi, mi isiñi ka kuibapanya ku yomuñwi.+
5 Kakuli yomuñwi ni yomuñwi ukashimba mulwalo* wahae.+
6 Hape mutu kaufela yalutwa* linzwi aabane mwa lika kaufela zende ni mutu yamuluta tuto yeo.*+
7 Musike mwaipuma: Mulimu hapumiwi. Kakuli kaufela sacala mutu, ki sona hape sakakutula;+
8 kakuli yacala ka kuya ka nama yahae ukakutula kubola mwa nama yahae, kono yacala ka kuya ka moya ukakutula bupilo bobusa feli ku ona.+
9 Ka mukwa ocwalo, lusike lwakatala kueza zende, kakuli lukakutula ka nako yateñi haiba lusazwafi.*+
10 Cwalehe, halusa nani kolo,* lueze zende kwa batu kaufela, kono sihulu kwa banabahabo luna mwa tumelo.
11 Hamubone butuna bwa litaku zeni miñolezi ka lizoho laka luli.
12 Kaufela bababata kutabisa batu mwa nama* ki bona babalika kumihapeleza kuya kwa mupato, sebaezeza cwalo ki kusaba feela kunyandiswa kabakala kota ya linyando* ya Kreste.
13 Kakuli nihaiba bona babaya kwa mupato habamameli Mulao,+ kono babata kuli mina muye kwa mupato kuli babe ni libaka la kuitumbela fa mubili wamina.
14 Kono nisike naitumba nikamuta, kwandaa kuitumba ka kota ya linyando* ya Mulenaa luna Jesu Kreste,+ yo ka yena lifasi libulailwe,* ka kuya ka mubonelo waka, mi ni na nibulailwe ka kuya ka mubonelo wa lifasi.
15 Kakuli kuya kwa mupato haki kwa butokwa ni kusaya kwa mupato+ haki kwa butokwa, kono sa butokwa ki kuba pupo yenca.+
16 Haili kaufela babazamaya ka mukwa oswanela ka mulao wo wa muzamao, babe ni kozo ni sishemo, kube cwalo ku Isilaele wa Mulimu.+
17 Kuzwa cwale kusike kwaba ni yanikataza, kakuli ninani maswayo a kuba mutangaa Jesu fa mubili waka.+
18 Haike sishemo sa Mulenaa luna Jesu Kreste sibe ni moya omubonisa, mizwale. Ameni.
Litaluso ze kwatasi
^ Kamba “mulwalo wa kuikalabela.”
^ Kamba “yalutwa ka mulomo.”
^ Kamba “tuto yeo ya ka mulomo.”
^ Kamba “lusakatali.”
^ Linzwi ka linzwi, “nako yetomilwe.”
^ Kamba “bababata kubonahala hande kwande.”
^ Mubone Litaluso za Manzwi.
^ Mubone Litaluso za Manzwi.
^ Kamba “libulaezwi fa kota.”
