Kwa Maheberu 4:1-16
4 Hakulicwalo, bakeñisa kuli sepiso ya kukena mwa pumulo yahae isali teñi, lutokomele* kuli kusike kwaba ni yomuñwi mwahalaa mina yakabonahala kuli wapalelwa kukwanisa zetokwahala kuli akene ku yona.+
2 Kakuli ni luna nelubulelezwi taba yende sina bona;+ kono linzwi lene bautwile nelisika batusa, bakeñisa kuli nebasika ba ni tumelo yeswana ni ya bane bautwile.
3 Kakuli luna bababonisize tumelo lukena mwa pumulo yahae, sina hanaabulezi kuli: “Kiha nikonka ka buhali bwaka, nali: ‘Habana kukena mwa pumulo yaka,’”+ nihaike kuli misebezi yahae neifelizwe pili lifasi lisika ba kale teñi.+
4 Kakuli kokuñwi mwa mañolo ubulezi ka za lizazi labu 7, uli: “Mi Mulimu apumula ka lizazi labu 7 kwa misebezi yahae kaufela,”+
5 mi hape fa uli: “Habana kukena mwa pumulo yaka.”+
6 Ka mukwa ocwalo, bakeñisa kuli babañwi basatokwa kukena mwateñi, mi bane babulelezwi taba yende pili nebasika kena mwateñi kabakala kusautwa kwabona,+
7 Mulimu hape utoma lizazi leliñwi ka kubulela hase kufitile nako yetelele mwa samu ya Davida kuli “Kacenu”; sina hase kubulezwi kale kuli, “Kacenu haiba muutwa manzwi ahae, musike mwatatafaza lipilu zamina.”+
8 Kakuli kambe Joshua+ naabaisize mwa sibaka sa pumulo, kambe Mulimu naasike atokwa kubulela za lizazi leliñwi hasamulaho.
9 Ka mukwa ocwalo, kusanani pumulo ya sabata yesiyalezi batu ba Mulimu.+
10 Kakuli mutu yakeni mwa pumulo ya Mulimu upumuzi ni kwa misebezi yahae yena muñi, sina Mulimu mwanaapumulezi ku yahae.+
11 Ka mukwa ocwalo, lueze molukonela kaufela kuli lukene mwa pumulo yeo, ilikuli kusike kwaba ni mutu yasike autwa sina bona.+
12 Kakuli linzwi la Mulimu lapila mi linani maata+ mi lishengile kufita mukwale olozizwe kafa ni kafa+ mi lipunya kuyo fita mane ni kwa makauhanelo a moyo* ni moya,* ni kwa makauhanelo a lingongo ni mooko, mi likona kulemuha mihupulo ni milelo ya mwa pilu.
13 Mi hakuna nto yebupilwe yeipatile mwa meeto ahae,+ kono lika kaufela litunumani mi li fa nalela mwa meeto a yena yeluswanela kuikalabela ku yena.+
14 Ka mukwa ocwalo, haubona lunani muprisita yapahami yamaata, yakeni mwa mahalimu, yena Jesu Mwanaa Mulimu,+ haluzweleñipili kumubulela patalaza.+
15 Kakuli yelunani haki muprisita yapahami yasakoni kuluutwela butuku mwa bufokoli bwaluna,+ kono ki yalikilwe mwa lika kaufela sina luna, kono asina sibi.+
16 Hakulicwalo, luatumele kwa lubona lwa sishemo sa Mulimu, inze lubulela ka kulukuluha,+ kuli luboniswe muhau ni sishemo sa Mulimu ilikuli lutusiwe ka nako yeswanela.
Litaluso ze kwatasi
^ Linzwi ka linzwi, “lube ni sabo.”
^ Mubone Litaluso za Manzwi.
^ Mubone Litaluso za Manzwi.
