Taba Yende Yeneñozwi ki Mark 11:1-33
11 Cwale hane bali bukaufi ni Jerusalema, kwa Betifage ni Betania+ fa Lilundu la Likota za Olive, aluma balutiwa bahae bababeli+
2 mi ali ku bona: “Muye mwa munzi omubona fapili, mi musakena feela mwateñi, mukafumana kambongolo kakafungilwe kakasika pahamwa kale ki mutu. Mukafungulule mi mukatise kwanu.
3 Mi haiba mutu amibuza kuli: ‘Kiñi semuezeza cwalo?’ mubulele muli: ‘Mulena wakatokwa mi uka kakutisa kwanu asafeza feela.’”
4 Cwale balutiwa baya mi bayo fumana kambongolo kakafungilwe fande kwa munyako wa ndu yeli bukaufi ni mukwakwanyana, mi bakafungulula.+
5 Kono babañwi ku bane bayemi fo, bababulelela, bali: “Kiñi semufungululela kambongolo?”
6 Balutiwa bababulelela feela manzwi anaa bataluselize Jesu, mi babalumeleza kuya.
7 Mi batisa kambongolo+ ku Jesu, mi bayala fateñi liapalo zabona za fahalimu, mi aina fateñi.+
8 Hape babañata bayala liapalo zabona za fahalimu mwa nzila, kono babañwi bona bapumaka mitai mwa masimu.+
9 Mi bane bazamaya kwapili ni bane bataha mwamulaho bazwelapili kuhuweleza, bali: “Umupilise, lwalapela!+ Ufuyozwi yena yataha ka libizo la Jehova!*+
10 Ufuyozwi Mubuso otaha wa ndataa luna Davida!+ Umupilise, lwalapela, wena yali mwa mahalimu!”
11 Mi akena mwa Jerusalema, ni kuya mwa tempele, mi atalima lika kaufela, kono kabakala kuli lizazi nese liile, azwa ni kuya kwa Betania ni ba 12.+
12 Habusa hane bazwa kwa Betania, Jesu ashwa tala.+
13 Asali kwahule, abona kota ya feiga yenenani matali, mi aya kwateñi kuli ayo bona haiba naakafumana sesiñwi ku yona. Kono hafitile kwateñi, atokwa kufumana sesiñwi kwandaa matali, kakuli nesi nako ya lifeiga.
14 Kihaa li kwa kota yeo: “Kusike kwaba ni mutu yakaca muselo ku wena hape.”+ Mi balutiwa bahae nebateeleza.
15 Cwale bataha mwa Jerusalema. Mwateñi, akena mwa tempele mi akala kulelekela kwande bane balekisa ni bane baleka mwa tempele, mi afetaula litafule za babacinca masheleñi ni lipula za babalekisa maiba,+
16 mi naasalumelezi mutu ufi kamba ufi kufita mwa tempele alwezi sika.
17 Naaluta batu, inze ali ku bona: “Kana hakusika ñolwa kuli, ‘Ndu yaka ikabizwa ndu ya tapelo ya macaba kaufela’?+ Kono mina muifetuzi makundamo a masholi.”+
18 Baprisita babahulu ni bañoli bautwa zeezahezi, mi bakala kubata mwaku mubulaela;+ kakuli neba musaba kabakala kuli buñata kaufela nebukomokile mulutelo wahae.+
19 Manzibwana, bazwa mwa muleneñi.
20 Kono hane bafita mwa nzila kakusasana-sasana, babona kota ya feiga kuli ki kale ioma kukalela kwa mibisi yaona.+
21 Pitrosi hahupula kota yeo, ali: “Rabbi, hakubone! Kota ya feiga yene ukutile iomile.”+
22 Jesu abaalaba, ali: “Mube ni tumelo ku Mulimu.
23 Kaniti namibulelela nili mutu kaufela yabulelela lilundu le kuli: ‘Nanuha mi unepelwe mwa liwate,’ mi asakakanyi mwa pilu yahae, kono anani tumelo ya kuli zabulela likaezahala, kukaezahala honacwalo.+
24 Ki lona libaka hanili ku mina, lika kaufela zemulapelela ni zemukupa, mube ni tumelo ya kuli muliamuhezi, mi muka lifumana.+
25 Mi hamuyema kuli mulapele, muswalele mutu ufi kamba ufi zamifoselize kaufela, kuli Ndataa mina ya mwa mahalimu ni yena amiswalele lifoso zamina.”+
26 *——
27 Bataha hape mwa Jerusalema. Mi hanaanze azamaya mwa tempele, baprisita babahulu ni bañoli ni baana-bahulu bataha
28 mi bali ku yena: “Ueza lika ze ka maata afi? Kamba ki mañi yakufile maata a kueza lika ze?”+
29 Jesu ali ku bona: “Nika mibuza puzo iliñwi. Munialabe, mi nika mitaluseza maata enieza ka ona lika ze.
30 Kana kolobezo ya Joani+ neizwa kwa lihalimu kamba kwa batu?* Hamu nialabe.”+
31 Cwale bakala kuikambota mwahalaa bona, bali: “Halukali, ‘Neizwa kwa lihalimu,’ yena ukali: ‘Cwale kiñi hane musika mulumela?’
32 Kamba lubulele kuli, ‘Neizwa kwa batu’?” Fo, nebasaba buñata, kakuli kaufelaa bona nebaanga kuli Joani neli mupolofita luli.+
33 Kiha baalaba Jesu, bali: “Haluzibi.” Jesu ali ku bona: “Kanti ni na, hanina kumibulelela maata enieza ka ona lika ze.”
Litaluso ze kwatasi
^ Mubone Litaba Zeekelizwe A5.
^ Mubone Litaba Zeekelizwe A3.
^ Kamba “neisimuluha kwa batu?”
