Taba Yende Yeneñozwi ki Mark 8:1-38
8 Mwa mazazi ao, nekunani buñata bobutuna hape, mi nebutokwile sakuca. Cwale Jesu kihaa biza balutiwa bahae mi ali ku bona:
2 “Nishwela buñata makeke,+ kakuli sebainzi ni na mazazi amalaalu, mi habana sakuca.+
3 Haiba nibalukulula kuya kwa mandu abona inze bashwile tala,* bakapalelelwa mwa nzila, mi babañwi ku bona bazwa kwahule.”
4 Kono balutiwa bahae bamualaba, bali: “Mutu ukona kufumana kai linkwa zelikani, kwahule ni batu kwanu, zekona kukulisa batu ba?”
5 Kihaa babuza, ali: “Munani linkwa zekai?” Bali: “Ze 7.”+
6 Mi alaela buñata kuli baine fafasi. Kihona aanga linkwa ze 7, afitisa buitumelo, alikomauna, ni kukala kulifa kwa balutiwa bahae kuli bafe batu, mi balifa kwa buñata.+
7 Hape nebanani tutapi tusikai, mi hasaalapezi, ababulelela kuli batufe batu ni tona.
8 Kiha baca, bakula, mi bataza lizuma zetuna* ze 7 ka buemba-emba bobusiyezi.+
9 Cwale nekunani baana bababato eza 4,000. Mi abalukulula.
10 Honafo akena mwa sisepe ni balutiwa bahae mi bataha mwa sibaka sa Dalmanuta.+
11 Bafalisi bataha kwateñi mi bakala kumukananisa, ka kubata kuli abafe sisupo sesizwa kwa lihalimu, kuli bamulike.+
12 Kihaa swaba hahulu mwa pilu mi ali: “Ki kabakalañi lusika lo halubata sisupo?+ Kaniti nili, hakuna sisupo seluka fiwa lusika lo.”+
13 Hasaabulezi cwalo, abasiya, akena hape mwa sisepe, mi asilela mwabuse bobuñwi.
14 Kono nebalibezi kulwala linkwa, mi nebasina sico mwa sisepe kwandaa sinkwa silisiñwi feela.+
15 Mi abalemusa ka kusakekuluha, ali: “Mutone; mutokomele mumela wa Bafalisi ni mumela wa Heroda.”+
16 Kiha bakala kukananisana ka za kusa lwala linkwa kwabona.
17 Jesu halemuhile cwalo, ali ku bona: “Mukananelañi ka za kutokwa linkwa? Kana hamulemuhi ni kuutwisisa ni ka nako ye? Kana lipilu zamina lisapalelwa kuutwisisa?
18 ‘Kana hamuboni, niha munani meeto; mi hamuutwi, niha munani mazebe?’ Kana hamuhupuli
19 hane nikomaunezi baana ba 5,000 linkwa zeketalizoho,+ ki lizuma zekai zene mutalize ka buemba-emba bone busiyezi?” Bali ku yena: “Ze 12.”+
20 “Hane nikomaunezi baana ba 4,000 linkwa ze 7, nemutalize lizuma zetuna* zekai ka buemba-emba bone busiyezi?” Mi bali ku yena: “Ze 7.”+
21 Kihaa li ku bona: “Kana hamuutwisisi ni ka nako ye?”
22 Cwale bafueka mwa Betsaida. Mwateñi batu bamutiseza muuna wa sibofu, mi bamukupa ka taata kuli amuswale.+
23 Mi Jesu aswala muuna yo wa sibofu kwa lizoho mi amuisa kwande a munzi. Hasaakwezi mati fa meeto ahae,+ amuswala ni kumubuza kuli: “Kana kunani seubona?”
24 Muuna yo atalima mwahalimu mi ali: “Nibona batu, kono babonahala inge likota zesweli kuzamaya.”
25 Hape abeya mazoho ahae fa meeto a mutu yo, mi mutu yo abona hande. Meeto ahae akala kubona, mi abona lika kaufela hande.
26 Cwale amubulelela kuli aye kwa ndu, mi ali: “Usike wakena mwa munzi.”
27 Cwale Jesu ni balutiwa bahae baya mwa minzi ya Sesarea wa mwa Filipi, mi hane bali mwa nzila akala kubuza balutiwa bahae, ali: “Batu bali ki na mañi?”+
28 Bali ku yena: “Bali ki wena Joani Mukolobezi,+ kono babañwi bali ki wena Elia,+ mi babañwi bona bali u yomuñwi wa bapolofita.”
29 Mi ababuza, ali: “Kono mina bo, muli ki na mañi?” Pitrosi amualaba, ali: “Ki wena Kreste.”+
30 Kihaa balaela ka taata kuli basike babulelela mutu ufi kamba ufi ka za hae.+
31 Hape akala kubaluta kuli Mwanaa mutu uswanela kukopana ni manyando amañata ni kuhaniwa ki baana-bahulu ni baprisita babahulu ni bañoli ni kuli ukabulaiwa,+ ni kuzuha hamulaho wa mazazi amalaalu.+
32 Kaniti naabulela manzwi ao patalaza. Kono Pitrosi amuisa kwatuko mi akala kumukalimela.+
33 Kihaa fetuha, atalimela balutiwa bahae, mi akalimela Pitrosi, ali: “Zwa ku na, Satani! Kakuli mihupulo yeunahana haki mihupulo ya Mulimu, kono ki ya batu.”+
34 Cwale abizeza buñata ni balutiwa bahae ku yena mi ali ku bona: “Haiba mutu ubata kunilatelela, aitobohe mi alwale kota yahae ya linyando* mi azwelepili kunilatelela.+
35 Kakuli mutu kaufela yabata kupilisa bupilo* bwahae ukasinyehelwa ki bona, kono mutu kaufela yasinyehelwa ki bupilo* bwahae kabakala ka ni kabakala taba yende uka bupilisa.+
36 Kutusañi luli ku mutu kuluwa lifasi kamukana kono ni kusinyehelwa ki bupilo* bwahae?+
37 Ki sifi luli sakona kufa mutu kuli aliulule bupilo* bwahae?+
38 Kakuli mutu kaufela yaniswabela ni kuswabela manzwi aka mwa lusika lo lwa bubuki* ni lwa sibi, Mwanaa mutu ni yena uka muswabela+ hakataha mwa kanya ya Ndatahe ni mangeloi akenile.”+
Litaluso ze kwatasi
^ Kamba “basika ca.”
^ Kamba “lizuma za lico.”
^ Kamba “lizuma za lico.”
^ Mubone Litaluso za Manzwi.
^ Kamba “moyo.”
^ Kamba “moyo.”
^ Kamba “moyo.”
^ Kamba “moyo.”
^ Kamba “lolusa sepahali.”
