Taba Yende Yeneñozwi ki Matthew 20:1-34
-
Baana bababeli ba libofu bafoliswa (29-34)
20 “Kakuli Mubuso wa mahalimu uswana sina muñaa ndu yanaapakezi kakusasana kuyo bata batu kuli bayo beleka mwa simu yahae ya veine.+
2 Hasaalumelelani ni babeleki kuli uka balifa dinari* iliñwi ka lizazi, abaluma mwa simu yahae ya veine.
3 Hazwa hape ibato ba ka hora yabulaalu,* abona babañwi babayemi fa patelo basina musebezi;
4 mi ali ku bona: ‘Ni mina hamuye mwa simu ya veine, mi nika mifa sesiswanela kaufela.’
5 Kiha baya. Hape azwa ibato ba ka hora yabu 6* ni yabu 9* mi aeza nto yeswana.
6 Kwa mafelelezo, ibato ba ka hora yabu 11,* azwa mi afumana babañwi babayemi, mi ali ku bona: ‘Kiñi hamuyemi fa, lizazi kaufela musina musebezi?’
7 Baalaba, bali: ‘Kakuli hakuna yalukenyize musebezi.’ Kihaa li ku bona: ‘Ni mina hamuye mwa simu ya veine.’
8 “Manzibwana, muñaa simu ya veine ali ku mubabaleli wa simu yahae: ‘Biza babeleki mi ubafe lituwelo zabona,+ kukala ka ba mafelelezo kutisa ku bapili.’
9 Bane bakeni ka hora yabu 11 habafita, baamuhela dinari* iliñwi mutu ni mutu.
10 Cwale bapili habataha, banahana kuli nebaka lifiwa hahulu, kono ni bona baamuhela tuwelo ya dinari* iliñwi.
11 Hase bafilwe tuwelo yeo, bakala kubilaela ku muñaa ndu,
12 mi bali: ‘Ba mafelelezo babelekile feela hora iliñwi; kono ubafile sesilikana ni seufile luna babasebelize ka taata lizazi kaufela kunze kucisa!’
13 Kono aalaba yomuñwi wa ku bona, ali: ‘Mulikani, hani kufosezi sesiñwi. Kana nelusika lumelelana dinari* iliñwi?+
14 Hakuunge sesili sahao mi uikele. Nibata kufa wa mafelelezo yo sesilikana ni seni kufile.
15 Kana hanina swanelo ya kuitusisa zaka monilatela? Kamba kana liito lahao linani muna* kabakala kuli ni mutu yomunde?’*+
16 Ka mukwa ocwalo, ba mafelelezo bakaba bapili, mi bapili bakaba ba mafelelezo.”+
17 Hane bakambamela kwa Jerusalema, Jesu aisa balutiwa ba 12 kwa mukunda mi ali ku bona mwa nzila+
18 “Hamubone! Lukambamela kwa Jerusalema, mi Mwanaa mutu ukafiwa mwa mazoho a baprisita babahulu ni bañoli. Baka muatulela lifu+
19 mi baka mufa mwa mazoho a ba macaba kuli bamusheunune ni kumushapa ni kumubulaela fa kota;+ mi fa lizazi labulaalu ukazusiwa kwa bafu.”+
20 Cwale mahe bana ba Zebedea+ amuatumela ni bana bahae, amukubamela, mi amukupa nto yeñwi.+
21 Ali ku yena: “Ubatañi?” Amualaba, ali: “Ubulele kuli bana baka bababeli ba, bakuine yomuñwi ku la bulyo ni yomuñwi ku la nzohoto, mwa Mubuso wahao.”+
22 Jesu aalaba, ali: “Hamuzibi semukupa. Kana mwakona kunwa mwa komoki yenituha ninwa ku yona?”+ Bali ku yena: “Lwakona.”
23 Ali ku bona: “Luli mukanwa mwa komoki yaka,+ kono taba ya kuniina ku la bulyo ni la nzohoto haki yaka kuli niife, kono libaka zeo ki za babalukiselizwe cwalo ki Ndate.”+
24 Balutiwa babañwi baalishumi habautwa cwalo, banyemela bo mutu ni munyanaa hae bababeli bao.+
25 Kono Jesu ababiza, mi ali: “Mwaziba kuli babusi ba macaba baahatelela mi babatuna baabusa ka taata.+
26 Hakulukeli kuba cwalo mwahalaa mina;+ kono mutu kaufela yabata kuba yomutuna mwahalaa mina ulukela kuba sikombwa samina,+
27 mi mutu kaufela yabata kuba wapili mwahalaa mina ulukela kuba mutangaa mina.+
28 Sina Mwanaa mutu hanaasika tela kuto sebelezwa, kono kuli asebeleze+ ni kufa bupilo* bwahae sina tiululo kuli aliulule babañata.”+
29 Hane bazwa mwa Jeriko, buñata bobutuna bwamulatelela.
30 Mi hamubone! Baana bababeli ba libofu bane bainzi kwatuko ni nzila bautwa kuli Jesu naafita mi bahuwa, bali: “Mulena, haku lushwele makeke, Mwanaa Davida!”+
31 Kono buñata bwabakalimela, mi bwababulelela kuli bakuze; kono cwale bona kihona bahuwa ka taata, bali: “Mulena, haku lushwele makeke, Mwanaa Davida!”
32 Jesu kihaa yema, ababiza, mi ali: “Kiñi semubata kuli nimiezeze?”
33 Bali ku yena: “Mulena, hakututubuluhise meeto aluna.”
34 Jesu abashwela makeke, aswala meeto abona,+ mi honafo bakala kubona, mi bamulatelela.
Litaluso ze kwatasi
^ Mubone Litaba Zeekelizwe B14.
^ Fo kikuli, ibato ba ka 9 ya kakusasana.
^ Fo kikuli, ibato ba ka 12 ya musihali.
^ Fo kikuli, ibato ba ka 3 ya musihali.
^ Fo kikuli, ibato ba ka 5 ya manzibwana.
^ Mubone Litaba Zeekelizwe B14.
^ Mubone Litaba Zeekelizwe B14.
^ Mubone Litaba Zeekelizwe B14.
^ Linzwi ka linzwi, “limaswe; linani lunya.”
^ Kamba “mutu yafana.”
^ Kamba “moyo.”
