Muekelesia 6:1-12
6 Kunani bumai* bobuñwi bonilemuhile mwatasaa lizazi, mi buatile mwahalaa batu:
2 Mulimu wa niti ufa mutu sifumu ni maluwo ni kanya, kuli asike aba ni sakalakaza; nihakulicwalo, Mulimu wa niti hamukonisi kuikola zona, nihaike kuli zakona kuikoliwa ki mutu usili. Zeo halina tuso mi ki manyando amatuna.
3 Haiba muuna apepa bana ba 100 ni kupila lilimo zeñata kufitela asupala, kono asaikoli lika zahae zende pili asika fita kale mwa libita,* fohe nikali mwana yafitelezi ufita mutu yo.+
4 Kakuli kutaha kwahae nekusika tusa sesiñwi mi uile mwa lififi, mi libizo lahae likwahezwi ki lififi.
5 Niha naasika bona lizazi kamba kuziba sesiñwi, usafita* mutu yo.+
6 Kutusañi kupila lilimo ze 2,000 mutu asaikoli bupilo? Kana batu kaufela habayi kwa sibaka sesiswana?+
7 Musebezi kaufela waikataza kueza mutu, uuezeza kuli afumane sakabeya mwa mulomo wahae;+ kono takazo yahae ya kuca haifeli.
8 Kakuli yabutali ufumana tuso mañi kufita sitoto,+ kamba kutusañi mubotana haziba mwakupilela?*
9 Ki hande kuikola zaabona meeto kufita kulatelela litakazo zanani zona mutu. Ni zona zeo halina tuso, ki kumatisa moya.
10 Lika kaufela zesebile teñi selifilwe kale mabizo, mi mutu wazibahala mwainezi; hakoni kukananisana* ni yanani maata kumufita.
11 Ka moabela buñata manzwi,* ki moabela asina tuso; mi mutu utusiwa cwañi ki ona?
12 Ki mañi yaziba nto yende hahulu yaswanela kueza mutu mwa bupilo, mwa mazazinyana a bupilo bwahae bobusina tuso, bobuswana sina muluti?+ Kakuli ki mañi yakona kubulelela mutu sesika ezahala mwatasaa lizazi hasaile?
Litaluso ze kwatasi
^ Kamba “ziyezi.”
^ Kamba “mi nihaiba libita lisika ba kale lahae.”
^ Linzwi ka linzwi, “upumula hahulu kufita.”
^ Linzwi ka linzwi, “mwakuzamaela fapilaa babapila.”
^ Kamba “kuzeka taba yahae.”
^ Kamba mwendi, “lika.”
