Zakaria 13:1-9
13 “Ka lizazi leo, lisima likakwalulelwa ba ndu ya Davida ni babayahile mwa Jerusalema kuli kukeniswe sibi ni masila.+
2 “Ka lizazi leo,” kubulela Jehova wa limpi, “nikafelisa mabizo a milimu ya maswaniso mwa naha,+ mi haisana kuhupulwa; mi nikazwisa bapolofita+ ni moya omasila mwa naha.
3 Mi haiba mutu apolofita hape, bo ndatahe ni bo mahe baba mupepile, bakali ku yena: ‘Hauna kupila, kakuli ubulezi buhata ka libizo la Jehova.’ Mi bo ndatahe ni bo mahe baba mupepile baka mutaba kabakala kuli naapolofita.+
4 “Ka lizazi leo, yomuñwi ni yomuñwi wa bapolofita ukaswabiswa ki pono yahae hakapolofita; mi haana kuapala siapalo sa bupolofita sa boya+ kuli apume.
5 Mi ukabulela kuli: ‘Hani mupolofita. Ni mulimi, kakuli nenilekilwe ki muuna yomuñwi hane nili mwanana.’
6 Mi haiba abuziwa ki mutu kuli: ‘Litombo zemwahalaa maheta ahao* ki zañi?’ ukaalaba, ali: ‘Ze ki litombo zene niholofalizwe mwa ndu ya balikani baka.’”*
7 “Wena mukwale, uzuhe, mi ulwanise mulisana+ waka,Ulwanise mutu yali mulikanaaka,” kubulela Jehova wa limpi.
“Ubulaye mulisana,+ mi mutapi* ukahasana;+Mi nikalibisa lizoho laka kulwanisa batu babasi ba butokwa.”
8 “Mi mwa naha kaufela,” kubulela Jehova,“Likalulo zepeli za mwateñi likabulaiwa ni kuyundiswa;*Mi kalulo yabulaalu ikasiiwa mwateñi.
9 Mi nikafitisa kalulo yabulaalu mwa mulilo;Mi nika bakenisa sina mokukenisezwa silivera,Ni kubalika sina mokulikelwa gauda.+
Bakabiza libizo laka,Mi nika baalaba.
Nikali: ‘Ki sicaba saka,’+
Mi bona bakali: ‘Jehova ki Mulimu waluna.’”
Litaluso ze kwatasi
^ Linzwi ka linzwi, “mwahalaa mazoho ahao.” Fo kikuli, fa sifuba kamba kwa mukokoto.
^ Kamba “baba nilata.”
^ Kamba “lingu.”
^ Kamba “kushwa.”