Zakaria 2:1-13
2 Natalima mi nabona muuna yasweli muhala wa kumishalisa+ mwa lizoho lahae.
2 Cwale namubuza, nali: “Uya kai?”
Aalaba, ali: “Niyo mishala Jerusalema kuli niyo ziba bupala bwayona ni butelele bwayona.”+
3 Mi bona! Lingeloi lene libulela ni na laya, mi lingeloi leliñwi lataha kuto kopana ni lona.
4 Mi lali kwa lingeloi leo: “Mata, uyo bulelela mutangana yani kuli: ‘“Jerusalema ukayahiwa+ sina munzi osika silelezwa,* kabakala batu kaufela ni limunanu ze ku yena.+
5 Mi ku yena,” kubulela Jehova, “nikaba limota la mulilo leli mupotolohile,+ mi nikaba kanya mwahalaa hae.”’”+
6 “Hamutahe! Hamutahe! Musabe kwa naha ya kwa mutulo,”+ kubulela Jehova.
“Kakuli nimihasanyelize kwa mioya yemine ya mahalimu,”+ kubulela Jehova.
7 “Taha, wena Sione! Baleha, wena yapila ni mwanaa Babilona+ wamusizana.
8 Kakuli ki se sabulela Jehova wa limpi, ili yo hamulaho wa kukanyiswa,* unilumile kwa macaba anaahapa tutu yamina,+ uli: ‘Mutu kaufela yamiswala uswala taku ya liito* laka.+
9 Kakuli cwale nikazungisa lizoho laka kubalwanisa, mi bakahapiwa ki batanga babona.’+ Mi luli mukaziba kuli Jehova wa limpi ki yena yanilumile.
10 “Uhuweleze ka tabo, wena mwanaa Sione+ wamusizana; kakuli nataha,+ mi nikapila mwahalaa mina,”+ kubulela Jehova.
11 “Ka lizazi leo, macaba amañata akataha ku Jehova,+ mi bakaba batu baka; mi nikapila mwahalaa mina.” Mi mukaziba kuli Jehova wa limpi ki yena yanilumile ku mina.
12 Jehova ukaluwa Juda sina saanda sahae mwa naha yekenile, mi ukaketa Jerusalema+ hape.
13 Hamukuze fapilaa Jehova, mina batu kaufela, kakuli uunga muhato inzaa li mwa sibaka sahae sesikenile.
Litaluso ze kwatasi
^ Fo kikuli, osina mamota aupotolohile.
^ Linzwi ka linzwi, “hamulaho wa kanya.”
^ Kamba “uswala mwa liito.”
