Zakaria 3:1-10
3 Mi anibonisa Joshua+ muprisita yapahami inzaa yemi fapilaa lingeloi la Jehova, mi Satani+ naayemi kwa lizoho lahae la bulyo kumulwanisa.
2 Cwale lingeloi la Jehova lali ku Satani: “Wena Satani,+ haike Jehova akukalimele, kube cwalo, haike Jehova yena yaketile Jerusalema,+ akukalimele! Kana yo haki sishingwa sesituka sesiyokozwi mwa mulilo?”
3 Cwale Joshua naaapezi liapalo zemasila, mi naayemi fapilaa lingeloi.
4 Lingeloi lali ku bane bali fapilaa lona: “Hamumutubule liapalo zahae zemasila.” Cwale lali ku yena: “Hakubone, nitahisize kuli bufosi* bwahao bufeliswe, mi ukaapeswa liapalo+ zende.”*
5 Kiha nili: “Hamumutinise kuwani yekenile kwa toho yahae.”+ Mi bamutinisa kuwani yekenile kwa toho yahae, bamuapesa liapalo; mi lingeloi la Jehova neliyemi kwatuko.
6 Cwale lingeloi la Jehova labulelela Joshua, lali:
7 “Jehova wa limpi sabulela ki se, uli: ‘Haiba uzamaya mwa linzila zaka ni kupeta buikalabelo bwahao fapilaa ka, fohe ukasebeza sina muatuli mwa ndu yaka+ ni kubabalela* malapa aka; mi nika kufa tumelezo ya kuba mwahalaa batu ba, babayemi fa.’
8 “‘Hakuteeleze, wena Muprisita Yapahami Joshua, wena ni balikani bahao babaina fapilaa hao, kakuli batu bao ki lisupo; hakubone! Nitisa mutangaaka,+ yabizwa Lituhela!+
9 Ubone licwe lenibeile fapilaa Joshua! Fa licwe lililiñwi kunani meeto a 7; mi nicakula fateñi manzwi,’ kubulela Jehova wa limpi, ‘mi nikazwisa mulatu wa naha yeo mwa lizazi lililiñwi.’+
10 “‘Ka lizazi leo,’ kubulela Jehova wa limpi, ‘yomuñwi ni yomuñwi wamina ukabiza mwanahabo yena kuli atahe mwatasaa kota yahae ya veine ni mwatasaa kota yahae ya feiga.’”+
Litaluso ze kwatasi
^ Kamba “mulatu.”
^ Kamba “liapalo zetelele zeapalwa fa mikiti.”
^ Kamba “kutokomela; kukantela.”
