Zakaria 4:1-14
4 Lingeloi lene libulela ni na lakuta mi lanizusa, sina mokuzusezwa mutu yalobezi.
2 Kiha lili ku na: “Ubonañi?”
Cwale nabulela, nali: “Hamubone! Nibona matomelo a lilambi aezizwe feela ka gauda,+ mi fahalimwaa ona kunani mukeke. Kunani lilambi ze 7 fateñi,+ ki cwalo, ki lilambi ze 7, mi lilambi zeo zefahalimwaa ona, linani mipila ye 7.
3 Mi kwatukwaa ona, kunani likota zepeli za olive,+ yeñwi kwa bulyo bwa mukeke ni yeñwi kwa nzohoto.”
4 Cwale nabuza lingeloi lene libulela ni na, nali: “Muñaaka, lika ze litalusañi?”
5 Mi lingeloi lene libulela ni na, labuza, lali: “Kana hauzibi selitalusa lika zeo?”
Naalaba, nali: “Hanizibi, muñaaka.”
6 Cwale lali ku na: “Ki se sabulela Jehova ku Zerubabele, uli: ‘“Haki ka mpi ya masole, kamba ka maata,+ kono ki ka moya+ waka,” kubulela Jehova wa limpi.
7 Ki wena mañi, wena lilundu lelituna? Ukafetuha naha yepatami*+ fapilaa Zerubabele.+ Mi yena ukazwisa licwe la fahalimu, batu inze bahuweleza bali: “Ki nto yetabisa! Ki nto yetabisa!”’”
8 Linzwi la Jehova hape lataha ku na, lali:
9 “Mazoho a Zerubabele ki ona aezize mutomo wa ndu+ ye, mi mazoho ahae kasibili aka ifeleleza.+ Mi mukaziba kuli ki Jehova wa limpi yanilumile ku mina.
10 Kakuli ki mañi yakendile lizazi la makalelo amanyinyani?*+ Kakuli bakanyakalala ni kubona muhala wa kumishalisa limota* o mwa lizoho la Zerubabele. Meeto a 7 ao ki ona meeto a Jehova atalima kafa ni kafa mwa lifasi kaufela.”+
11 Kiha nimubuza, nali: “Likota za olive zepeli ze, zeinzi kwa bulyo ni kwa nzohoto ya matomelo a lilambi+ litalusañi?”
12 Namubuza lwabubeli, nali: “Mañata amabeli a mitainyana* ya likota za olive aasululela sitipwi-tipwi sa gauda mwa mipila yemibeli ya gauda, atalusañi?”
13 Cwale anibuza, ali: “Kana hauzibi selitalusa lika zeo?”
Naalaba, nali: “Hanizibi, muñaaka.”
14 Ali: “Bao ki bona batoziwa bababeli babayemi kwatuko ni Mulena wa lifasi kaufela.”+
Litaluso ze kwatasi
^ Kamba “libala.”
^ Kamba “lika zenyinyani?”
^ Linzwi ka linzwi, “licwe, tini.”
^ Fo kikuli, mitainyana yeshakatezi hahulu.
