Zakaria 6:1-15
6 Cwale natalima hape mi nabona likoloi zeene zenezwa mwahalaa malundu amabeli, mi malundu ao neli a kopa.
2 Koloi yapili neihohiwa ki lipizi zefubelu, mi koloi yabubeli neihohiwa ki lipizi zensu.+
3 Koloi yabulaalu neihohiwa ki lipizi zesweu, mi koloi yabune neihohiwa ki lipizi za bundolindoli ni za mibala-bala.+
4 Nabuza lingeloi lene libulela ni na, nali: “Ze ki lika mañi muñaaka?”
5 Lingeloi lanialaba, lali: “Zeo ki mioya+ yemine ya mahalimu yezwa hamulaho wa kuyema fapilaa Mulena wa lifasi kaufela.+
6 Yehohiwa* ki lipizi zensu iya kwa naha ya kwa mutulo;+ zesweu liya kwa sibaka sesikwabuse bwa liwate; mi za bundolindoli liya kwa naha ya kwa mboela.
7 Mi za mibala-bala nelibata hahulu kuyo zamaya kafa ni kafa mwa lifasi.” Cwale ali: “Hamuye, muzamaye kafa ni kafa mwa lifasi.” Mi zakala kuzamaya kafa ni kafa mwa lifasi.
8 Cwale anihuweleza, mi ali: “Bona, zeya kwa naha ya kwa mutulo litahisize kuli moya wa Jehova ube mwa naha ye kwa mutulo.”
9 Linzwi la Jehova hape lataha ku na, lali:
10 “Uunge ku Helidai, Tobija, ni Jedaya, lika zene baangile kwa batu baba mwa buhapiwa; mi ka lizazi leo, uye ku ba ndu ya Josiasi mwanaa Zefania hamoho ni bao babazwile kwa Babilona.
11 Uunge silivera ni gauda mi ueze kuwani ya bulena,* mi uibeye kwa toho ya Joshua+ mwanaa Jehozadaki, muprisita ya pahami.
12 Mi umubulelele, uli:“‘Jehova wa limpi sabulela ki se, uli: “Ki yo muuna yabizwa Lituhela.+ Ukashoshela inzaa li mwa sibaka sahae, mi ukayaha tempele ya Jehova.+
13 Ki yena yakayaha tempele ya Jehova, mi ki yena yakayola bulena. Ukaina mwa lubona lwahae ni kubusa, mi hape ukaba muprisita fa lubona lwahae,+ mi kukaba ni swalisano mwahalaa litulo zepeli zeo.*
14 Mi kuwani ya bulena* ikaina mwa tempele ya Jehova kuli ibe yona fakahupulelanga* Helemi, Tobija, Jedaya,+ ni Hene mwanaa Zefania.
15 Mi babainzi kwahule bakataha kuli bato yaha tempele ya Jehova.” Mi mukaziba kuli Jehova wa limpi ki yena yanilumile ku mina. Mi kukaezahala cwalo—haiba muutwa linzwi la Jehova Mulimu wamina.’”
Litaluso ze kwatasi
^ Fo kikuli, koloi.
^ Kamba “kuwani ya bulena yetuna.”
^ Fo kikuli, mwahalaa musebezi wahae wa kuba mubusi ni wa kuba muprisita.
^ Kamba “kuwani ya bulena yetuna.”
^ Kamba “kupuliso.”
