La Bubeli, la 11 April, Bakreste babañata babafokozi kwa moya bakafumaneha kwa Kupuzo. Nebamatanga mwa siyano ya bupilo kono cwale bakutezi mwamulaho ka mabaka ashutana-shutana, mi amañwi a mabaka ao atalusizwe mwa broshuwa ya Mukutele ku Jehova. (Maheb. 12:1) Nihakulicwalo, batu babafokozi kwa moya basali ba butokwa hahulu ku Jehova, yena yanaaitekezi bona ka mali a Mwanaa hae. (Lik. 20:28; 1 Pit. 1:18, 19) Lukona kubatusa cwañi kuli bakutele kwa puteho?

Baana-bahulu ba puteho balikanga ka taata kubata ni kutusa Bakreste babafokozi kwa moya sina feela mulisana yaikataza kubata lingu zekeluhile mwa mutapi. (Luka 15:4-7) Buikatazo bo, bubonisa kuli Jehova wabalata mi waiyakatwa bona. (Jer. 23:3, 4) Haki baana-bahulu feela babakona kususueza batu bao, kono kaufelaa luna lwakona kueza cwalo. Buikatazo bolueza bwa kubabonisa sishemo ni kutwelo-butuku butabisa Jehova mi bukona kulutahiseza limbuyoti zetuna. (Liprov. 19:17; Lik. 20:35) Kacwalo, muhupule batu bomukona kususueza, mi mueze cwalo kapili-pili!

MUBUHE VIDIO YELI, MUSUSUEZE BABAFOKOZI KWA MOYA, MI HASAMULAHO MUNYAKISISE LIPUZO ZELATELELA:

• Bo Abbey nebaangile muhato mañi hane bakopani ni Paki yomuñwi yene basazibi?

• Ki kabakalañi haluswanela kuatumela baana-bahulu haiba lunahana za kutusa mutu yomuñwi yafokozi kwa moya?

• Bo Abbey nebaitukiselize cwañi hane bayo potela bo Laura lwabubeli?

• Bo Abbey nebabonisize cwañi tundamo, pilu-telele, ni lilato hane balika kususueza bo Laura?

• Lukona kuitutañi kwa swanisezo yanaafile Jesu yefumaneha kwa Luka 15:8-10?

• Ki limbuyoti mañi zenezwile mwa buikatazo kaufela bone buezizwe bwa kutusa bo Laura?