Kuzwisa mutu mwa puteho kusileleza puteho ni kufa kalimelo ku sifosi yasabaki. (1 Makor. 5:6, 11) Haiba luyemela kalimelo yecwalo yezwa ku Jehova, lubonisa lilato. Lukona kubulela cwañi cwalo haili fo kuzwisa mutu mwa puteho kutahisa masitapilu kwa batu babañata, kukopanyeleza cwalo ni ba mwa lubasi lwa sifosi ni mizwale ba mwa katengo ka buatuli?

Sa butokwa hahulu ki kuli, lubonisa lilato kwa libizo la Jehova ni kwa likuka zahae zekenile. (1 Pit. 1:14-16) Hape lubonisa lilato ku mutu yazwisizwe mwa puteho. Kalimelo yetiile niha iutwisa butuku, yakona kubeya “muselo wa kozo wa kuluka.” (Maheb. 12:5, 6, 11) Haiba luswalisana ni mutu yazwisizwe mwa puteho kamba yaikauhanyize, lubonisa kuli halulumelelani ni kalimelo ya Jehova. Muhupule kuli Jehova ufanga batu bahae kalimelo ‘yebaswanela.’ (Jer. 30:11) Haluyemela kalimelo ya Jehova ni kuzwelapili kueza lika za kwa moya, lukaba ni sepo ya kuli mutu yaezize bufosi ukakutela ku Ndataa luna yasishemo.—Isa. 1:16-18; 55:7.

MUBUHE VIDIO YELI, MUZWELEPILI KUSEPAHALA KA PILU ILIÑWI, MI KIHONA MUKAALABA LIPUZO ZELATELELA:

• Bashemi ba Sikreste bautwanga butuku bobucwañi haiba mwanaa bona afulalela Jehova?

• Babañwi mwa puteho bakona kutusa cwañi ba mwa lubasi lwa mutu yafulalezi Jehova?

• Ki taba mañi ya mwa Bibele yebonisa kuli luswanela kusepahala hahulu ku Jehova kufita molusepahalela kwa lubasi lwaluna?

• Lukona kubonisa cwañi kuli lusepahala hahulu ku Jehova kufita molusepahalela kwa lubasi lwaluna?