Jesu naalutile kuli: “Mufilwe feela, ni mina mufane feela.” (Mat. 10:8) Lubonisa kuli lwamamela taelo yeikutwahalela hande yeo, ka kusalifisa batu halu bafa Bibele kamba yeñwi ya lihatiso zaluna zetomile fa Bibele. (2 Makor. 2:17) Nihakulicwalo, lihatiso zeo linani litaba za niti za butokwa zezwa mwa Linzwi la Mulimu. Kueziwanga buikatazo bobutuna mi kubanga ni lisinyehelo zeñata kuli lihatiso zeo lihatiswe ni kulumelwa kwa liputeho mwa lifasi kaufela. Kabakaleo, luswanela kuunganga feela lihatiso zelutokwa.

Mube ni temuho hamufa batu lihatiso, niha muli fa libaka fomuezeza bupaki bwa fa nyangela. (Mat. 7:6) Mwa sibaka sa kufa feela lihatiso zaluna ku bo lifitanzila, mueze buikatazo bwa kuambola ni bona kuli mulemuhe haiba batabela. Kana mukaalaba kuli eni ku yeñwi ya lipuzo ze mwa mbokisi yebonisizwe? Haiba mupalelwa kuziba hande nji mutu watabela kamba hatabeli, ki hande kumufa feela trakiti. Kono haiba akupa magazini kamba hatiso yeñwi, luka mufa hatiso yeo.—Liprov. 3:27, 28.