Hamutalima palisa yende, lihalimu mokutezi linaleli, kamba kubuha sibuba sesinde, kana mwalemuhanga kuli kunani Mubupi yaezize lika zeo? Lika zebupilwe ili zelukona kubona lipatulula hande tulemeno twa Jehova totusa bonahali. (Maro. 1:20) Haluba ni nako ya kunahanisisa lika zelubona ka meeto aluna, lwakona kulemuha tulemeno totuñwi twa Mulimu totucwale ka maata, lilato, butali, katulo yelukile, hamoho cwalo ni bufani bwanani bona.—Samu 104:24.

Ki lika mañi zabupile Jehova zemubonanga zazi ni zazi? Nihaikaba kuli mupila mwa tolopo, mwakona kubona linyunywani kamba likota. Kutalimisisanga zabupile Jehova kwakona kulutusa kufukuza kwa lipilaelo zaluna, kulutusa kuisa pilu kwa lika za butokwa hahulu, ni kulutusa kuekeza kwa tumelo yelunani yona ya kuli Jehova uka lubabalela kuya kuile. (Mat. 6:25-32) Haiba mu bashemi, mutuse bana bamina kulemuha tulemeno twa Jehova totuipitezi. Haluitebuha hahulu lika zebupilwe zelukona kubona, lukasutelela hahulu ku Mubupi.—Samu 8:3, 4.

MUBUHE VIDIO YA PUPO YEMAKAZA IPATULULA KANYA YA MULIMU—LISELI NI MIBALA, KIHONA MUKAALABA LIPUZO ZELATELELA:

• Lika zetahisa kuli mubala ucince lilutusa cwañi kubona hande mibala?

• Ki lika mañi zetahisanga kuli sika sesiñwi sikone kucinca-cinca mibala?

• Ki kabakalañi halubonanga mibala yeshutana-shutana mwa mbyumbyulu?

• Ki mibala ifi yebuheha ya lika zebupilwe yemubonanga bukaufi ni komupila?

• Ki kabakalañi haluswanela kufumananga nako ya kutalimisisa lika zebupilwe?