Kuyaha tempele ya mwa Isilaele nekutokwa kusebeza ka taata mi nekunani lisinyehelo zeñata. Nihakulicwalo, Maisilaele nebatusize mwa musebezi wo ka tukufalelo. (1 Makol. 29:2-9; 2 Makol. 6:7, 8) Maisilaele mone bababalelela tempele yeo hase ifelizwe kuyahiwa, nekubonisa kuli nebatiile kwa moya kamba kutokwa. (2 Mal. 22:3-6; 2 Makol. 28:24; 29:3) Kacenu, Bakreste baitusisanga nako ni maata abona kwa kuyaha, kukenisa, ni kubabalela Mandu A Mubuso ni Libaka za Mikopano. Nihakulicwalo, kusebeza ni Jehova ka nzila yeo, ki tohonolo yetuna hahulu mi ki kalulo ya sebelezo yaluna yekenile.—Samu 127:1; Sin. 7:15.

• Kukenisa hande hamulaho wa mikopano. Haiba miinelo yamipalelwisa kukenisa, munope masila afumaneha kwatuko ni sipula samina.

• Kuabananga kamita mwa musebezi wa kukenisa ni kubabalela Ndu ya Mubuso. Kusebeza hamoho kwatabisa mi kwaimulula.—lv 92-93 ¶18.

• Kufanga linubu. Nihaiba nubu ya “tusheleñi to tubeli twa muwayawaya, twa teko ye nyinyani” totufiwa ka kuzwelela kwa pilu, twatabisa Jehova.—Mare. 12:41-44.

• Kuitatela kutusa mwa musebezi wa kuyaha ni kulukisa sinca libaka za kulapelela haiba miinelo yamina yamikonisa kueza cwalo. Hamutokwi kuba ni yeloseli mwa musebezi wa kuyaha kuli muabane mwa musebezi wo.