Bibele neipolofitile kuli Satani naaka lunyandisa kuli apaleliswe bukombwa bwaluna. (Joa. 15:20; Sin. 12:17) Lukona kutusa cwañi Bakreste babañwi babasweli kunyandiswa mwa linaha zeñwi? Lwakona kubalapelela. “Kupo ya mutu yalukile inani maata amatuna.”—Jak. 5:16.

Ki lika mañi zelukona kukupa mwa tapelo? Lwakona kukupa Jehova kuli afe mizwale ni likaizeli bundume ni kubatusa kuli basike basaba. (Isa. 41:10-13) Hape lwakona kukupa kuli atuse babusi kuli balumeleze musebezi wa kukutaza, “ilikuli luzwelepili kupila bupilo bwa kozo inze lukuzize.”—1 Tim. 2:1, 2.

Paulusi ni Pitrosi hane banyandiswa, Bakreste ba mwa linako za baapositola neba balapelezi ka kubapunda fa mabizo. (Lik. 12:5; Maro. 15:30, 31) Nihaike kuli haluzibi mabizo a mizwale kaufela babanyandiswa kacenu, kana lwakona kupunda liputeho, linaha, kamba sibaka kobafumaneha?