Muunge kuli mupila mwa muleneñi wa Galilea mwa linako za Jesu. Muzamaile musipili kutaha kwa Jerusalema kutoeza Mukiti wa Minganda. Mwa muleneñi wa Jerusalema, kutezi balumeli sina mina babañata-ñata babazwa kwa libaka za kwahule. Mubata kufa sitabelo ku Jehova. Kacwalo, mufita mwahalaa batu babañata-ñata mwa muleneñi kuliba kwa tempele. Hamufita kwa tempele, mufumana batu babañata-ñata kwateñi ili bababata kufa sitabelo. Hasamulaho wa nako, seli mina cwale babaswanela kufa puli kwa baprista. Mi ka nako yeo, muhupula kuli kunani mwanahenu yemusa utwani ni yena, ya mwahalaa buñata bwa batu kamba mwa muleneñi. Jesu utalusa zemuswanela kueza. (Mubale Mateu 5:24.) Kuli mulatelele zanaabulezi Jesu, mukona kupila cwañi ka kozo ni mutu yemufoselize? Mwa litaba zebonisizwe kwatasi, mulaitele sisupo semubona kuli silukile.

MUSWANELA . . .

• kuambolisana feela ni mwanahenu haiba muikutwa kuli mwanahenu ufilikani mi mwautwisisa libaka haikutwa cwalo

• kutusa mwanahenu haiba muikutwa kuli mutu yo ki wa kacima-cima kamba haiba haitumelelangi mulatu

• kuteeleza ku mwanahenu hanze amitaluseza mwaikutwela, nihaikaba kuli hamuutwisisi, mumukupe kuli amiswalele kabakala butuku bwaikutwa kamba kabakala zemumufoselize ka kusalela

MWANAHENU USWANELA . . .

• kukupa tuso ku babañwi mwa puteho ka kubataluseza momumufoselize

• kumihanyaukela, kumitaluseza lika kaufela zemumufoselize, ni kumitaluseza kuli muitumelele mafosisa amina

• kuitumela ku mina kabakala buikokobezo ni bundume bomubonisize ka kumuatumela, mi uswanela kumiswalela kuzwelela kwatasaa pilu

Nihaike kuli halusa ezanga matabelo a lifolofolo kacenu mwa bulapeli bwaluna, ki swalisano mañi yanaatalusa Jesu yemwahalaa kupilisana ka kozo ni mwanahabo luna ni sebelezo yaluna ku Mulimu?