Jehova uunga buitamo bwa linyalo kuba bwa butokwa hahulu. Naabulezi kuli muuna ni musali babanyalani habaswaneli kukauhana. (Mat. 19:5, 6) Kunani batanga ba Mulimu babañata babakondisize mwa linyalo. Nihakulicwalo, hakuna linyalo lelipetehile. Batu babanyalani kaufela bakopananga ni miinelo yetaata. Haluswaneli kuba ni mubonelo oatile mwa lifasi wa kuli batu babanyalani bakona kutatulula butata ka kauhano kamba kufelisa linyalo. Bakreste babanyalani bakona kubukeleza cwañi linyalo labona?

Munyakisise lika zeketalizoho ze za butokwa.

1. Mubabalele pilu yamina ka kuambuka lika zecwale ka kueza linyawe ni kuitabisa ka lika zesusueza muzamao wa buhule, ili zesinya feela linyalo la mina.—Mat. 5:28; 2 Pit. 2:14.

2. Mutiise silikani samina ni Mulimu, mi muhulise takazo yamina ya kubata kumutabisa mwa linyalo lamina.—Samu 97:10.

3. Muzwelepili kuapala mutu yomunca, ni kueza lika zenyinyani zebonisa sishemo ili zeka tahisa kuli bakumina baikutwe kuimuluha.—Makolo. 3:8-10, 12-14.

4. Muzwelepili kuikambotanga ka likute ni ka nzila yetusa.—Makolo. 4:6.

5. Mupete buikalabelo bwamina bwa mwa linyalo ka lilato.—1 Makor. 7:3, 4; 10:24.

Bakreste habakuteka linyalo, babonisa likute ku Jehova yena Musimululi wa linyalo.

MUBUHE VIDIO YELI, LUSWANELA “KUMATA KA BUITIISO”—LULATELELE MILAO YA KANGISANO, MI KIHONA MUKA ALABA LIPUO ZELATELELA:

• Nihaike kuli linyalo likona kuba lelinde kwa makalelo, ki miinelo mañi yetaata yebakona kukopana ni yona baba mwa linyalo?

• Likuka za mwa Bibele likona kutusa cwañi batu babaikutwa kuli hakuna lilato mwa linyalo labona?

• Ki milao mañi yatomile Jehova ka za linyalo?

• Ki lika mañi zebatokwa kueza batu babanyalani kuli bakondise mwa linyalo?